Ulttyq bank tóraǵasy Qazaqstanda aýylsharýashylyq bankin qurýǵa qatysty óz pikirin bildirdi
ASTANA. 21 maýsym. QazAqparat - Qazaqstanda mamandandyrylǵan memlekettik bank qurýǵa qarsymyz, alaıda qyzmet kórsetip otyrǵan bankterdi aýyl shaýrashylyǵy salasyna baǵyttaýǵa bolady.
Bul týraly búgin Senattyń jalpy otyrysynda depýtattar suraqtaryna jaýap bergen Ulttyq bank tóraǵasy Grıgorıı Marchenko málim etti.
UB tóraǵasynyń aıtýynsha, Qazaqstanda buǵan deıin de aýyl sharýashylyǵy salasyna mamandanǵan bank jumys istegen jáne sol bank úsh ret bankrottyqqa ushyraǵan.
«1994 jyly biz sondaı banktiń qurylymyn ózgerttik. Keıinnen ol ekinshi ret 2000 jyly bankrotqa ushyrap, ony jeke ınvestorlar satyp aldy, sosyn ol «Naýryz bank» bolyp qaıta quryldy. Keıinnen ol da bankrot boldy. Ókinishke qaraı, táýelsizdikten bergi ýaqytta memlekettik jáne memleket janyndaǵy bankterdiń bul saladaǵy qyzmet nátıjesi eshqandaı da jaǵymdy sıpatta bolǵan emes», - deıdi G. Marchenko.
Onyń aıtýynsha, táýelsizdikten beri Qazaqstanda mamandandyrylǵan-kommertsııalyq 5 bank jumys istegen. Solardyń 4-eýi bankrotqa ushyrady.
«Árıne, biz Ulttyq bank retinde óz tájirıbemizdi saralaı kelsek, osy salada dál mamandandyrylǵan bank ashýǵa qarsymyz. Alaıda, buǵan eshqandaı da kedergi joq. Biz bul týraly baıaǵydan aıtyp kelemiz: mamandandyrylǵan memlekettik emes bank qurýǵa da ne bolmasa qyzmet etip otyrǵan bankti satyp alýǵa da bolady. Sol arqyly ondaı bankti aýyl sharýashylyǵy salasyna baǵyttaýǵa da bolady. Sondyqtan da, biz buǵan eshqalaı qarsy emespiz. Eń bastysy zań talaptary men normatıvtik quqyqtyq talaptar oryndalsa bolǵany», - dedi G. Marchenko.
