Ulttyq bank «Tólemder jáne tólem júıeleri týraly» zańǵa túsinikteme berdi
Zańnyń maqsaty Qazaqstanda tólem júıeleriniń jumys istep turýyn keshendi reglamentteý jáne tólem qyzmetteri naryǵyn retteý, sondaı-aq tólem qyzmetterin tutynýshylardyń quqyqtaryn qorǵaýdy kúsheıtý jáne tólemder men aqsha aýdarymdaryn júzege asyrý salasyndaǵy bank praktıkasyn jetildirý bolyp tabylady, dep habarlaıdyUlttyq banktiń baspasóz qyzmeti.
Zańda myna baǵyttar boıynsha jańalyqtar kózdelgen: Tólem júıeleriniń jumys isteýi salasynda Zańda «tólem júıesi», «tólem júıesiniń operatory» jáne «tólem júıesine qatysýshylar» degen negizgi uǵymdar, tólem júıeleriniń jiktelýi jáne olardyń mańyzdylyǵynyń ólshemsharttary (júıelik mańyzy bar, mańyzdy jáne ózge de tólem júıeleri), tólem júıeleriniń operatorlaryna qoıylatyn talaptar engizilgen jáne olardyń qyzmetin uıymdastyrýdyń quqyqtyq negizi aıqyndalǵan. Tólem júıeleriniń qyzmetin júzege asyrýdyń habarlaý sıpaty engiziledi, atap aıtqanda, tólem júıesiniń operatory Qazaqstanda tólem júıesi jumys isteı bastaǵan kúnnen bastap kúntizbelik on kún ishinde bul jóninde Ulttyq Bankke habarlaıdy. Tólem júıesiniń operatory Internet-resýrsynda tólem júıeleriniń qaǵıdalaryn, bul qaǵıdalarǵa ózgerister men tolyqtyrýlardy, qyzmettiń qunyn jáne tarıfter boıynsha barlyq ózgeristerdi jarııalaýǵa tıis bolady. Bul rette Qazaqstan Respýblıkasynyń aýmaǵynda Zań qoldanysqa engizilgenge deıin qyzmetin júzege asyrǵan tólem júıeleriniń operatorlary óz qyzmetin Zań alǵashqy ret resmı jarııalanǵan kúnnen keıin alty aı ishinde onyń talaptaryna sáıkes keltirýi qajet. Zańda júıelik mańyzy bar jáne mańyzdy tólem júıeleri operatorlarynyń Ulttyq Bankke tıisti málimetterdi usynýy da kózdelgen. Ulttyq Bank jumys istep turǵan tólem júıeleriniń tizilimin júrgizetin bolady, tólem júıeleriniń mańyzdylyǵy kórsetile otyryp, naryqta osyndaı júıelerdiń bar ekendigi týraly aqparat Ulttyq Banktiń resmı Internet-resýrsynda jarııalanady. Tólem qyzmetteri naryǵyn retteý salasynda Zań tólem qyzmetterin berýshilerdiń tizbesin jáne olar kórsetetin tólem qyzmetteriniń túrlerin aıqyndaıdy, sondaı-aq jeke banktik emes tólem uıymdary úshin Ulttyq Bankte eseptik tirkelý rásimin engizedi. Tólem qyzmetterin berýshilerge Zańǵa sáıkes: 1) bankter; 2) bank operatsııalarynyń jekelegen túrlerin júzege asyratyn uıymdar; 3) pochtalyq aqsha aýdarymdaryn júzege asyratyn poshta operatorlary; 4) tólem uıymdary; 5) tólem agentteri men qosalqy agentter jatady. Mundaı jaǵdaıda tólem uıymy, tólem agentteri jáne banktiń qosalqy agentteri naryqtyń jańa sýbektileri bolyp tabylady, Zańda olar úshin tólem qyzmetterin kórsetý úshin quqyqtyq negiz kózdelgen. Jurtshylyqty habardar etý úshin Ulttyq Bankte eseptik tirkeýden ótken tólem uıymdarynyń tizilimi Ulttyq Banktiń resmı Internet-resýrsynda ornalastyrylatyn bolady. Zańda «tólem qyzmetterin mańyzdy berýshi» degen uǵym engiziledi, sondaı-aq tólem qyzmetterin berýshilerdi mańyzdy berýshilerge jatqyzýdyń ólshemsharttary aıqyndalady. Ulttyq Bank tólem qyzmetterin mańyzdy berýshilerdiń tizilimin júrgizetin bolady jáne aqparatty Ulttyq Banktiń resmı Internet-resýrsynda ornalastyrady. Tólemder men aqsha aýdarymdaryn júzege asyrý salasynda tólemder men aqsha aýdarymdaryn júzege asyrý tásilderi men negizgi rásimderi jetildirildi, tólemderdi oryndaý merzimderin qysqartý úshin (4 kúnnen 2 kúnge deıin) jaǵdaı jasaldy, sondaı-aq bank qyzmetterin kórsetýdiń aıqyndylyǵyn qamtamasyz etý jónindegi sharalar kózdeldi. Zańda bankterdiń halyqqa arnalǵan bazalyq tólem qyzmetteriniń qoljetimdiligin arttyrýǵa baǵyttalǵan halyqqa belgili bir tólem qyzmetterin kórsetý úshin agentter men qosalqy agentter jelilerin tartý múmkindigi belgilengen. Tólem júıeleriniń jáne tólem qyzmetteri naryǵynyń jumys isteýi salasyndaǵy qarym-qatynastardy memlekettik retteýdi engizý nátıjesinde oń áleýmettik-ekonomıkalyq saldarlar kútilýde: bank qyzmetteriniń aıqyndylyǵy men qoljetimdiligin arttyrý, tólemderdi jyldamdatý, tólem qyzmetteri naryǵynda qolaıly básekeles jaǵdaılar týdyrý, Qazaqstan aýmaǵynda jumys isteıtin tólem júıeleri, tólem qyzmetteriniń mańyzdy berýshileri men tólem uıymdary týraly jurtshylyqqa habarlaý, banktik emes tólem uıymdarynyń qyzmetterin paıdalaný kezinde tutynýshylardyń quqyqtaryn qorǵaýdy kúsheıtý. Zańda qosymsha halyqty áleýmettik qorǵaýǵa baǵyttalǵan sharalar kózdelgen. Atap aıtqanda, kelesi qarjy kózderi boıynsha úshinshi tulǵalardyń talap etýlerimen klıentterdiń aqshasyn óndirip alýǵa shekteýler qoıylǵan - járdemaqylar jáne áleýmettik tólemder, turǵyn úı tólemderi, azamattardyń notarıýs depozıti shartymen engizilgen aqshalary, sondaı-aq azamattardyń bilim berý jınaqtaý salymy týraly shart boıynsha ashylǵan bank shottaryndaǵy aqshalary.
Zańda bankter men ózge tólem qyzmetterin berýshilerge halyqaralyq tólemderdi eseptemegende, kórsetiletin tólem qyzmetteri boıynsha tarıfterdi ulǵaıtý jaǵyna birjaqty tártipte ózgertýge tyıym da salynǵan, sondaı-aq olardyń klıentti tólem operatsııasyn jasaǵanǵa deıin komıssııanyń mólsherimen tanystyrý mindeti engiziledi.
