Ulttyq bank teńgeniń erkin aıyrbastaý baǵamy rejimin ustanady - Danııar Aqyshev
ASTANA. QazAqparat - Ulttyq bank teńgeniń erkin aıyrbastaý baǵamy rejimin ustanyp tur. Bul týraly Parlament Senatynda tilshilerge Ulttyq bank tóraǵasy Danııar Aqyshev málim etti, dep habarlaıdy QazAqparat.
Onyń sózine qaraǵanda, sońǵy aptada teńgeniń AQSh dollaryna baǵamy shetel valıýtasyna degen suranystyń joǵary bolýy saldarynan álsireýin kórsetti. Halyqtyń shetelge demalysqa barý maýsymy suranystyń artýynyń negizgi faktorlary boldy. Sonyń saldarynan qolma qol aqshany teńgeden AQSh dollaryna aıyrbastaý baıqaldy.
UB basshysynyń aıtýynsha, AQSh-tyń Qazaqstannyń negizgi saýda áriptesi Reseıge qatysty salǵan sanktsııalary kapıtaldyń RF-ten shyǵarylýyn kúsheıtti. Bul rýbl baǵamynyń álsireýine alyp keldi, ıaǵnı ol teńge baǵamyn qalyptastyrý faktorlarynyń biri bolyp tabylady.
«Ulttyq Bank teńgeniń erkin ózgermeli aıyrbastaý baǵamy rejimin ustanýdy jalǵastyrýda. Valıýta naryǵyna qatysýshylar teńgeniń baǵamyn túbegeıli faktorlardyń yqpal etýimen shetel valıýtasyna suranys pen usynys negizinde qalyptastyrdy», - dedi Qazaqstan Ulttyq Bankiniń basshysy.
D.Aqyshev sońǵy ýaqytta syrtqy monetarlyq talaptardyń qatańdatylýy, geosaıası táýekelderdiń kúsheıýi jáne damýshy naryqtardan kapıtaldyń jylystaýy jaǵdaıynda teńge baǵamy qubylmalylyqty kórsetti dep atap ótti. Bul rette Ulttyq banktiń qalyptasyp otyrǵan ahýalǵa degen reaktsııasy beıtarap boldy.
«Qazaqstan Ulttyq Bankiniń óktemdigi barynsha az boldy. Bizdiń valıýta naryǵyna qatysýymyz, mysaly alypsatarlyq operatsııalar jáne basqa da irgeli emes faktorlardyń yqpalyna baılanysty valıýta baǵamyn kúrt turaqsyzdandyratyn ózgeristerdi boldyrmaýǵa baǵyttalǵan», - dedi D.Aqyshev.
