Ulttyq bank teńge depozıtterine tólenetin ótemaqy týraly aıtty

ASTANA. QazAqparat – Teńge depozıtteriniń 10 paıyzdyq ótemaqysyna ótinim qabyldaý kelesi aptada aıaqtala ma? Ulttyq banktiń basqarma tóraǵasy Ǵalymjan Pirmatov osy maǵynada taraǵan aqparattarǵa túsinik berdi, dep habarlaıdy QazAqparat tilshisi.

«Qazir Ulttyq banktiń teńge depozıtterine 10 paıyzdyq syıaqy tóleý bastamasy belsendi nasıhattalyp jatyr. Osy ótemaqyǵa ótinish tirketý úshin 1 apta ǵana qalǵany týraly aqparat tarady? Qanshalyqty shyn»,- dep surady BAQ ókili Ulttyq banktiń brıfıngisinde.

Ulttyq bank tóraǵasynyń sózine qaraǵanda, resmı kózderden ondaı málimet shyqpaǵan.

«Birinshiden, men barshańyzdy resmı kózderden taraǵan aqparatty ǵana negizge alýǵa shaqyramyn. Atalǵan ótemaqyny tóleýdiń erejesin Úkimet qaýlysy bekitken. Ol ereje boıynsha, ótinimder 2023 jyldyń 1 qańtaryna deıin berilýi kerek. Ondaı ótinishtiń qajettigi osy ótemaqyny alǵysy kelgen ár azamat óz nıetin bankke habarlaý kerektigimen jáne ózi týraly belgili bir derekterdi ashýǵa kelisim berýi qajettigimen baılanysty. Bankterdiń kóbi óz klıenterine bul ótinishti onlaın rejımde rásimdeýge múmkindik berip otyr», - dedi Ǵalymjan Pirmatov.

Onyń aıtýynsha, ózge bankter de atalǵan ótinishti onlaın qabyldaý jumystaryn júrgizýde.

«Taǵy da eske salamyn, bul ótemaqyny ulttyq valıýtamen depozıt ustaıtyn, 2022 jyldyń 23 aqpanynda shottarynda aqsha bolǵan jáne ol aqsha 2023 jyldyń 23 aqpanyna deıin saqtalǵan azamattar alady», - dedi Ulttyq bank basshysy.