Ulttyq bank teńge baǵamynyń ózgeristeri týraly aldyn ala habarlap otyrýǵa ýáde berdi
ASTANA. QazAqparat - QR Ulttyq banki (UB) teńge baǵamynyń ózgeristeri týraly aldyn ala habarlap otyrýǵa ýáde beredi. Bul týraly búgin OKQ brıfınginde Ulttyq bank tóraǵasy Qaırat Kelimbetov aıtty.
Onyń aıtýynsha, Ulttyq bank saıasaty teńgeniń kúrt quldyrap, «tereń» devalvatsııaǵa ushyraýyna jol bermeıdi. UB neǵurlym ońtaıly aıyrbas baǵamyn ustanyp otyrady. Degenmen, UB tóraǵasynyń aıtýynsha, bul aıyrbas kýrsy turaqty bolady degen sóz emes.
«Teńge baǵamyn birtindep rettep otyrmasaq, taǵy da devalvatsııalyq ósim jınala beredi. Ózderińiz kórip otyrsyzdar, teńge baǵamy 2014 jyldan beri 180 men 184 teńge aralyǵynda qubylyp otyrdy. Al búgin 1 dollarǵa shaqqanda 185 teńgege jetti. Bul qazirgi ishki jáne syrtqy makroekonomıkalyq jaǵdaıǵa tolyq tótep bere alatyn baǵam deýge bolady. Sondyqtan, biz orta merzimdi kezeńde neǵurlym yńǵaıly baǵa qalyptastyrý saıasatyna kóshemiz. Kez kelgen mundaı aýysý aldyn ala habarlanatyn bolady. Osylaısha naryq sýbektileri mán-jaıdy bilip otyrady», - dep túsindirdi Q. Kelimbetov.
