Ulttyq bank teńge baǵamynyń álsireýine qatysty túsinik berdi
ASTANA. QazAqparat - Sońǵy 10 kúnde - 2017 jylǵy 21 tamyz - 6 qyrkúıek aralyǵynda teńgeniń AQSh dollaryna qatysty baǵamy 2,6%-ǵa álsiredi, bul bankterdiń, kompanııalardyń jáne halyqtyń tarapynan shetel valıýtasyna degen suranystyń usynystan asyp ketýi saldarynan oryn aldy, dep habarlaıdy QR Ulttyq banktiń baspasóz qyzmeti.
Teńgeniń erkin ózgermeli baǵamy jáne Ulttyq banktiń valıýtalyq saýda-sattyqqa qatysýyn barynsha azaıtý jaǵdaılarynda mundaı jaǵdaı baǵamnyń avtomatty túrde álsireýine ákeledi. Ulttyq valıýtanyń orta merzimdi perspektıvadaǵy baǵamyn aıqyndaıtyn turaqty irgeli faktorlardyń aıasynda (saýda áriptes elderdegi munaı baǵasy jáne valıýta baǵamdary) jekelegen sarapshylardyń málimdemelerimen ýshyqqan devalvatsııalyq kútýler teris áserin tıgizdi.
Ulttyq bank shetel valıýtasynyń jetkilikti usynysy bolmaǵan jaǵdaıda ony satýshy boldy. Tamyzda Ulttyq banktiń netto-óktemdikteriniń kólemi 70 mln AQSh dollaryn qurady.
Sondaı-aq qyrkúıektiń birinshi aptasynda Ulttyq bank shetel valıýtasyn satý jóninde óktemdik júrgizdi. Aı qorytyndysy boıynsha derekter qazannyń basynda jarııalanady. 5-6 qyrkúıekte ahýal turaqtandy.
Ulttyq banktiń pikirinshe, eger munaı baǵasy bir barrel úshin 50 AQSh dollarynan tómendemese, al Reseı rýbliniń baǵamy bir AQSh dollary úshin 59-60 rýblden aspasa, teńgeniń AQSh dollaryna qatysty baǵamy aǵymdaǵy deńgeıde saqtalady.
Sonymen birge aıyrbastaý baǵamynyń aǵymdaǵy deńgeıi rýblge qatysty jetkilikti baǵalanbaı otyr, bul ony túzetý úshin alǵysharttar jasaıdy.
