Ulttyq bank teńge baǵamyna qatysty jaǵdaı turaqtanǵanyn jarııalady

NUR-SULTAN. QazAqparat – Mamyr aıynan bastap teńge baǵamy turaqtana bastady. Bul týraly QR Ulttyq banki tóraǵasynyń orynbasary Álııa Moldabekova málim etti, dep habarlaıdy QazAqparat.

Búgin elordada ótken baspasóz máslıhatynda tilshiler teńgeniń shetel valıýtasyna qatysty bir deńgeıde nyǵaıýyna qatysty suraq qoıdy.

Bul rette QR Ulttyq bankiniń tóraǵasy Ǵalymjan Pirmatov osy baǵytta UB erkin aıyrbas baǵamy saıasatyn ustanatynyn atap ótti.

Óz kezeginde Álııa Moldabekova bıylǵy aqpannan beri teńge baǵamynyń qubylmalyǵy geosaıası táýekelder men jahandyq naryqtaǵy ózgeristerge baılanysty bolǵanyn aıtty.

«Sondyqtan erkin aıyrbas baǵamy rejıminde turǵan teńgege atalǵan jaǵdaılar yqpal etti. Bizdiń oıymyzsha, teńgeniń erkin baǵamy syrtqy ahýalǵa ekonomıkamyzdyń ári naryǵymyzdyń jyldam beıimdelýine múmkindik beredi. Mamyr aıynan bastap jaǵdaı turaqtandy. Buǵan syrtqy naryqtardaǵy ahýaldyq turaqtanýy yqpal etti. Qazirgi kezde munaıdyń, energııa resýrstarynyń baǵasy óskenin baıqap otyrmyz. Bul resýrstar bizdiń eksportqa shyǵaratyn negizgi taýarymyz bolyp otyr», - dedi Á. Moldabekova.

Osy oraıda UB tóraǵasynyń orynbasary atalǵan turaqtaný protsesine eksporttaýshylar tarapynan shetel valıýtasyndaǵy usynystarynyń artýy yqpal etkenin atap ótti.

«Sondyqtan valıýta naryǵyndaǵy jaǵdaı teńdestirilgenin kórip otyrmyz», - dedi ol.

Budan buryn habarlanǵandaı, Ulttyq bank tóraǵasy bazalyq mólsherlemeni 14 paıyz deńgeıinde saqtaýǵa qatysty pikir bildirdi.

Jyldyq mánde ınflıatsııa mamyrda 14 paıyzǵa jetti.

Sonymen qatar Ǵ. Pirmatov osy jyldyń qorytyndysy boıynsha ınflıatsııany 13-15 paıyz deńgeıinde bolýy múmkin ekenin aıtty.