Ulttyq bank teńge baǵamy serpininiń boljamyn arttyrý mindetin alǵa qoıady
NUR-SULTAN. QazAqparat - Ulttyq bank teńge baǵamy serpininiń boljamyn arttyrý mindetin alǵa qoıady. Bul týraly búgin Úkimet otyrysynda «Úkimet pen Ulttyq Bank arasyndaǵy 2019 jylǵa arnalǵan makroekonomıkalyq saıasat sharalaryn úılestirý týraly kelisim jóninde» baıandaǵan QR Ulttyq bank tóraǵasy Erbolat Dosaev aıtty, dep habarlaıdy QazAqparat tilshisi.
"Ulttyq bank teńge baǵamy serpininiń boljamyn arttyrý mindetin alǵa qoıyp otyr. Valıýtalyq saýda-sattyqqa aralaspaý saıasatyn saqtaı otyryp, Ulttyq bank ıkemdi óktemdilik jasaý quqyǵyn ózine qaldyrdy. Shetel valıýtasyn satyp alý nemese satý boıynsha josparlanǵan operatsııalar týraly aqparattyń júıeliligi men aıqyndylyǵy valıýta naryǵyna turaqtylyq beredi", - dedi Erbolat Dosaev.
Onyń atap ótýinshe, valıýtalyq táýekelderdi hedjırleýdiń mańyzdy quraly retinde týyndy qarjy quraldarynyń naryǵyn damytý sharalary qabyldanady.
"Instıtýtsıonaldyq ınvestorlar naryǵyn, jedel jáne jınaq depozıtterin damytýǵa, bankaralyq naryqta jáne baǵaly qaǵazdar naryǵyndaǵy naryqtyq ındekster men kórsetkishterdi qalyptastyrýǵa erekshe nazar aýdarylmaq. Baǵa belgileýdiń tıimdiligin arttyrý úshin bankaralyq naryqta jáne baǵaly qaǵazdar naryǵynda naryqtyq ındekster men ındıkatorlardy qalyptastyrý qamtamasyz etiledi", - dedi ol.
