Ulttyq Bank táýekeldi saıasatty júrgizetin bankterdi baqylaýdy kúsheıtedi
ASTANA. QazAqparat - QR UB tóraǵasynyń orynbasary Oleg Smolıakov «Egemen Qazaqstan» gazetine «Ulttyq Bank habarlaıdy, túsinikteme beredi, túsindiredi» arnaıy jobasy sheńberinde suhbat bergen kezde retteýshige normatıvterdi buzbaǵan, biraq táýekeldi saıasat júrgizetin bankterge qatysty aldyn alý sharalaryn qoldanýǵa múmkindik beretin táýekelge baǵdarlanǵan qadaǵalaýdy engizýge baǵyttalǵan zańnamalyq ózgerister týraly aıtyp berdi.
Qazaqstan halqyna joldaýy sheńberinde Memleket basshysynyń bank sektoryn qalypqa keltirý boıynsha sharalar keshenin ázirleýdi, formaldanǵan tásilden táýekelge baǵdarlanǵan qadaǵalaýǵa ótýdi qamtamasyz etýdi tapsyrǵanyn eske saldy. Onyń aıtýy boıynsha Ulttyq Bank bank sektoryn qalypqa keltirý boıynsha sharalar keshenin ázirleýge kiristi, onyń sheńberinde retteýshilik jáne qadaǵalaý protsesiniń halyqaralyq qaǵıdattary iske asyrylatyn bolady.
«Atap aıtqanda, Ulttyq Bank problemalardyń týyndaýyn jáne táýekeldiń iske asyrylýyn kútpesten, daǵdarysty qubylystardyń aldyn alý boıynsha jumysty kúsheıtýdi josparlap otyr. Qazirgi kezde Ulttyq Bank Eýropalyq Odaqta qabyldanǵan ádisnamanyń negizinde táýekelge baǵdarlanǵan qadaǵalaýdy engizý tásilderin maquldady. Bul tásilder bıznes modeldiń jumys isteý qabiletin baǵalaý ádisnamasyn jáne oǵan tán táýekelderdi aıqyndaýdy, bankterdiń táýekelderdi basqarý jáne ishki baqylaý júıelerin, sondaı-aq kapıtal men ótimdiliktiń jetkiliktiligin aıqyndaýdyń ishki júıelerin qamtıtyn jańa qadaǵalaý modelin ázirleýdi kózdeıdi», - dep naqtylady O. Smolıakov. «Táýekelge baǵdarlanǵan qadaǵalaý den qoıý qadaǵalaý sharalary júıesiniń tolyq ózgerýin, atap aıtqanda, qoldanystaǵy shekteýli yqpal etý sharalaryn jáne erterek den qoıý sharalaryn, sanktsııalar men májbúrleý sharalaryn qoldaný negizderin túbegeıli ózgertýdi kózdeıdi», - dep túsindirdi ol. O. Smolıakov atap ótkendeı, bul qadaǵalaý modeli bankterdiń ártúrli táýekelderge ushyraǵyshtyq deńgeıin olardy basqarý júıelerin jetildirý arqyly kezeń-kezeńimen tómendetýge múmkindik beredi.
«2017 jyly Ulttyq Bank banktiń kapıtalyn tıisti túzetýmen (retteýshilik menshikti kapıtaldy retteýshilik provızııalar men HQES boıynsha provızııalardyń arasyndaǵy aıyrmasyna azaıtý) provızııalardy baǵalaýdyń biryńǵaı ádistemesin engizýdi josparlap otyr. Budan basqa, bankterdiń baılanysty tulǵalarmen jasalǵan mámilelerdi jáne jeńildik berilgen talaptarmen jasalǵan mámilelerdi baǵalaý tásilderi kúsheıtiletin bolady. Sondaı-aq, aýdıtorlar men baǵalaýshylardyń banktiń qarjylyq jaǵdaıynyń nasharlaǵany týraly aqparatty jasyrǵany úshin jaýapkershiligin kúsheıtý, tipti qarjy naryǵynda qyzmetin júzege asyrýǵa tyıym salýǵa deıin kúsheıtý máseleleri qaralady. Sonymen qatar, Ulttyq Banktiń mandaty bank kapıtalynyń qurylymyn májbúrlep qaıta qurylymdaý jáne bankterdi biriktirý protsesin jeńildetý bóliginde zańnamalyq deńgeıde kúsheıtiledi», - dep sózin qorytyndylady QR Ulttyq Banki tóraǵasynyń orynbasary.
