Ulttyq bank tarapynan teńge baǵamyna qatysty boljam jasalmaıdy
NUR-SULTAN. QazAqparat - Ekonomıkalyq saladaǵy sýbektiler tarapynan valıýta naryǵyndaǵy suranys pen usynys boıynsha aqparattyń eleýli ashyqtyǵy qamtamasyz etilýi kerek. Bundaı pikirdi Úkimette ótken baspasóz máslıhatynda QR Ulttyq bank tóraǵasynyń orynbasary Janat Qurmanov aıtty, dep habarlaıdy QazAqparat tilshisi.
«Teńge baǵamyna toqtalsaq, Ulttyq bank aldaǵy ýaqytta da erkin aıyrbas baǵamy rejimin ustanady. Ózderińiz bilesizder, bul turǵyda Qazaqstan qor bırjasynda valıýtaǵa suranys pen usynys negizinde baǵam qalyptasady. Sondyqtan bankter men olardyń klıentteri tarapynan valıýtaǵa usynys pen suranystyń ashyqtyǵyn qamtamasyz etý mańyzdy», - dedi J. Qurmanov tilshiler saýalyna jaýap bere otyryp.
Onyń sózine qaraǵanda, birinshi kezekte valıýta naryǵynda Ulttyq qor qarjysy qandaı jolmen qaıta konversııalanatyndyǵy týraly, sondaı-aq naryqtyń boljamdyǵy boıynsha kvazımemlekettik sektor kásiporyndary valıýta naryǵyna qalaı shyǵatyndyǵy týrasynda aqparatty ashý úshin memlekettiń tıisti sharalardy qabyldaýy óte mańyzdy bolyp tur.
«Ulttyq bank tarapynan teńge baǵamyna qatysty belgili bir boljam nemese joramal aıtylmaıdy. Osy turǵyda erkin aıyrbas baǵamy rejimi aıasynda ekonomıkalyq qyzmet sýbektileri tarapynan valıýta naryǵyndaǵy suranys pen usynys boıynsha aqparattyń eleýli ashyqtyǵyn qamtamasyz etý kerek», - dedi Janat Qurmanov.
QR UB ókili mereke aldyndaǵy teńge baǵamyndaǵy aýytqýlarǵa túsinik berdi.
«Mereke qarsańyndaǵy baǵaǵa toqtalsaq, onyń ósimi negizinen jekeleı pýnkterde baıqaldy. Qazaqstan qor bırjasynda tańerteńgilik sessııa ashylǵan kezde baǵam aıtarlyqtaı turaqty boldy. Belgilengen kúnderi valıýta usynysy jetkiliksiz bolǵan jaǵdaıda baǵamnyń aýytqýy bolatyny túsinikti», - dedi ol.
