Ulttyq Bank tamyzda valıýtalyq ınterventsııa júrgizgen joq

NUR-SULTAN. QazAqparat - Tamyzdyń qorytyndysy boıynsha, teńge 1 AQSh dollary úshin 472,29 teńgege deıin (1%-ǵa) nyǵaıdy. Qazaqstan qor bırjasyndaǵy saýda-sattyqtyń ortasha kúndik kólemi bir aıda 118,6 mln AQSh dollarynan 98 mln AQSh dollaryna deıin tómendedi, dep habarlaıdy QazAqparat QR Ulttyq bankiniń baspasóz qyzmetine silteme jasap.

Saýda-sattyqtyń jalpy kólemi 2,2 mlrd AQSh dollaryn qurady. Valıýta naryǵy suranys pen usynys turǵysynan teńestirildi. «Úlken salyq aptasy» usynys tarapynan qosymsha faktor bolyp tabylady.

Kvazımemlekettik sektor sýbektileriniń valıýtalyq túsimdi satýy shamamen 469,5 mln AQSh dollaryn qurady. Kvazımemlekettik sektor kompanııalary ekinshi deńgeıli bankter arqyly valıýta naryǵynda satýdy óz betinshe júzege asyrady.

Ulttyq Bank tamyzda valıýta naryǵyna qatyspady: valıýtalyq ınterventsııa júrgizbedi, BJZQ zeınetaqy aktıvteri men senimgerlik basqarýdaǵy basqa da qorlar úshin shetel valıýtasyn satyp alý nemese satý boıynsha operatsııalardy júzege asyrmady, sondaı-aq Ulttyq qordan respýblıkalyq bıýdjetke transfertterdi qamtamasyz etý úshin valıýta satý protsesine qatysqan joqy. Transfertter Ulttyq qorǵa teńgedegi túsimder esebinen qamtamasyz etildi.

Qysqa merzimdi perspektıvada teńgeniń qubylmalylyǵy geosaıası jaǵdaıdyń ózgerýine, ishki qatysýshylardyń kútýlerine jáne álemdik naryqtardaǵy ahýalǵa baılanysty bolady. Ulttyq Bank teńgerimsizdikterdiń jınaqtalýyn boldyrmaıtyn jáne altyn-valıýta rezervteriniń saqtalýyn qamtamasyz etetin ıkemdi baǵam belgileý rejımin ustanýdy jalǵastyrady.