Ulttyq bank «Súıinshi» atty kúmis monetalardy aınalymǵa shyǵarady
ASTANA. QazAqparat - QR Ulttyq Banki 12 qyrkúıekten bastap nomınaly 500 teńgelik kúmisten jasalǵan jáne nomınaly 100 teńgelik melhıor qospasynan jasalǵan «Súıinshi» kollektsııalyq monetalaryn aınalysqa shyǵarady, dep habarlaıdy QazAqparat banktiń baspasóz qyzmetine silteme jasap.
Atalmysh monetalar «Qazaqstannyń ádet-ǵuryptary, ulttyq oıyndary» serııasyna kiredi. Súıinshi - qýanyshty jańalyq. Qýanyshty habar jetkizgen adamǵa «qalaǵanyńdy al» dep, syılyq beredi. «Súıinshi» degen sózdi aıtqanda kez kelgen adam jaqsy habar jetkiziletinin biledi.
Kúmisten jáne melhıor qospasynan jasalǵan monetalardyń bet jáne syrt jaqtaryndaǵy beıneler birdeı.
Monetalar 925 synamaly kúmisten jasalǵan, massasy - 24 gramm, dıametri - 37 mm, daıyndaý sapasy - «proof», taralymy - 2 myń dana. Al ekinshi túri melhıor qospasynan jasalǵan, dıametri - 31 mm, massasy - 11,17 gramm, daıyndaý sapasy - «brilliant uncirculated», taralymy - 30 myń dana.
Nomınaly 500 jáne 100 teńgelik kollektsııalyq monetalar Qazaqstan Respýblıkasynyń búkil aýmaǵynda kórsetilgen qunymen tólemniń barlyq túrleri boıynsha, sondaı-aq bank shottaryna esepteý jáne aýdarym jasaý úshin qabyldanýǵa mindetti. Qazaqstan Respýblıkasynyń barlyq bankterinde shekteýsiz usaqtalady jáne aıyrbastalady.
Monetalar kollektsııalyq quny boıynsha satýǵa arnalǵan. Kúmis monetalar kádesyılyq oraýymen shyǵarylady jáne Ulttyq Banktiń memlekettik, orys jáne aǵylshyn tilderindegi nómirlik sapa sertıfıkatymen jabdyqtalǵan. Melhıor qospasynan jasalǵan monetalar satý úshin arnaıy polıgrafııalyq oraýǵa salynǵan.
Kollektsııalyq monetalardy Qazaqstan Respýblıkasy Ulttyq Bankiniń barlyq aýmaqtyq fılıaldarynda, sondaı-aq nationalbank.kz saıtynda «Ulttyq valıýta» degen bólimde Internet-dúken arqyly satyp alýǵa bolady.
