Ulttyq Bank shyǵarǵan altyn quımalardy satyp alýda qandaı táýekelder bar
ASTANA. QazAqparat - Búgin QR Ulttyq bank Astana fılıalynyń dırektory Ámirbek Sanqybaev elimizdiń Ulttyq banki shyǵarǵan altyn quımalardy satyp alýdaǵy táýekelderdi atady, dep habarlaıdy QazAqparat.
«Osy jyldyń 31 mamyrynan bastap Ulttyq bank elimizdiń azamattaryna, turǵyndaryna altyn quımalaryn satyp alý baǵdarlamasyn engizdi. Bul baǵdarlama ótken jyldyń qyrkúıek aıynda Elbasynyń tikeleı tapsyrmasymen Úkimettiń keńeıtilgen otyrysynda qabyldandy. Búgingi kúni barlyq daıyndyq jumystary aıaqtaldy jáne osy baǵdarlama azamattarǵa qoljetimdi ekendigin habarlaımyz»,- dedi ol.
Osy rette Sanqybaev baǵdarlamanyń azamattarymyz úshin qanshalyqty tıimdiligine jáne qandaı táýekelder bar ekendigine keńinen toqtaldy.
«Qazirgi kezde ózderińiz bilesizder azamattardyń jınaqtary bank depozıtterinde qolma-qol shetel valıýtasymen turady. Sondyqtan biz kelesi jınaqtyń bir túrin usynyp otyrmyz. Ol - altyn quımalaryn satyp alý. Óıtkeni bul jınaqtyń halyq úshin qolaıly jáne qarapaıym túri bolyp sanalady. Ulttyq banktiń moneta saraıy 10, 20, 50 jáne 100 gramdyq altyn quımalaryn jasady. Bul altyn quımalardy ekinshi deńgeıli bankter arqyly satyp alýǵa bolady. Aıta keterligi, bul bastamanyń negizgi maqsaty - halyq arasynda altyn quımalardy satý emes onyń tıimdiligin kórsetý. Sebebi ony tez arada satyp alyp, qaıta ótkizýge bolady. Qazirgi kúni bul baǵdarlamany Halyq bank pen Eýrazııalyq bank júzege asyrý múmkindigin aldy. Ulttyq bank basqa banktermen de tıisti kelissózderdi júrgizýde. Oıymyzsha, jaqyn arada basqa bankter de osy baǵdarlamaǵa qosylatyn bolady»,- dedi fılal basshysy.
Onyń aıtynsha altyn quımalarymen Astana, Almaty, Óskemen jáne Atyraý qamtylǵan. Qazirdiń ózinde halyq tarabynan suranys bar. Halyq bank ózderiniń fılıaldary arqyly atalǵan tórt qaladan basqa óńirlerge de jetkizýde.
«Táýekelderge toqtar bolsam, ózderińiz bilesizder altyn qaı kezde de altyn bolyp qala beredi. Alaıda altyn quımalaryn satyp alýda táýekelder bar. Ol álemdik naryqta ózgerip otyratyn altyn quny jáne ulttyq valıýta baǵamy ekendigin aıtýǵa bolady. Óıtkeni altynnyń quny joǵarylaýy ne tómendeýi múmkin», - dedi Sanqybaev.
