Ulttyq bank sheteldik valıýtanyń qozǵalysyn qatań baqylaýǵa alady
«Valıýtalyq retteý jáne valıýtalyq baqylaý týraly» zańnyń ózgeristeri men jańa normalary týraly búgin Almatyda ótken dóńgelek ústel barysynda jýrnalısterge QR Ulttyq Banki Tólem ballansy jáne valıýtalyq retteý departamentiniń dırektory Aıgúl Boranbaeva áńgimeledi.
Onyń aıtýynsha, Ulttyq bank jańa zańnamaǵa sáıkes sheteldik valıýta qozǵalysyn qatań baqylaýda ustaıtyn bolady.
«Taldaý kórsetkendeı, ár aı saıyn valıýtany satyp alýdyń 30 paıyzyn satyp alýshylar mindettemelerin óteý úshin emes basqa maqsatta júzege asyrady. Osy operatsııalardy qatań baqylaýǵa alamyz, - dedi ol.
Onyń aıtýynsha, qaryz Qazaqstan rezıdentine qaıtpaǵan jaǵdaıda mundaı mámileler quqyq qorǵaý organdarynyń nazaryna ilinedi.
Al jalpy alǵanda zańnamanyń basqa pýnktteri boıynsha sharalardy qatańdatý kózdelmeıdi.
Aıgúl Boranbaeva atap ótkendeı, zań jobasynda yryqtandyrylǵan valıýtalyq rejım qaǵıdattaryn jáne valıýtalyq retteýdiń qoldanystaǵy aqparattyq quraldaryn saqtaý kózdeledi, sondyqtan ony qabyldaý teris áleýmettik-ekonomıkalyq saldarlarǵa ákep soqpaıdy.
«Zań jobasyn ázirleýdiń maqsaty serpindi damyp otyrǵan naryqtar jaǵdaıyndaǵy valıýtalyq retteý jáne valıýtalyq baqylaý salasynda týyndaıtyn quqyqtyq qatynastardy retteýdi jetildirý bolyp tabylady. Onyń ishinde sheteldik uıymdar fılıaldarynyń Qazaqstan naryǵyna kirýiniń keńeıtilýin eskere otyryp jáne «Astana» halyqaralyq qarjy ortalyǵynyń qurylýyna baılanysty», - dedi ol.
Zań jobasyn qabyldaý - kapıtaldyń transshekaralyq qozǵalysynyń statıstıkalyq monıtorıngin jaqsartýǵa, valıýtalyq retteý rejımderiniń negizgi rásimderin ońtaılandyrýǵa, kásipkerlik qyzmette jáne halyqtyń operatsııalarynda jáne sol sııaqty makroekonomıkalyq deńgeıde iske asyrylatyn qolma-qol aqshasyz jáne qolma-qol konversııalyq operatsııalardyń táýekelderin barynsha azaıtýǵa múmkindik jasaıdy.
Aıgúl Boranbaeva habarlaǵandaı, qazirgi kezde zań jobasynyń mátini ǵylymı saraptamanyń, memlekettik organdardyń, qoǵamdyq qaýymdastyqtardyń (Ulttyq kásipkerler palatasy jáne Qazaqstan qarjygerleriniń qaýymdastyǵy) eskertýleri men usynystary boıynsha pysyqtalýda.
«Zań jobasynyń mátini ashyq túrde Ulttyq Banktiń saıtyna 2017 jylǵy 25 mamyrda ornalastyrylǵan. Biz sondaı-aq zań jobasy boıynsha suraqtarǵa Ulttyq Banktiń Facebook- tyń «QR Ulttyq Banki habarlaıdy, túsindiredi, túsinikteme beredi» degen betinde jaýap berýge daıynbyz», - dep tolyqtyrdy QR UB ókili.
