Ulttyq bank: Shetel valıýtasyndaǵy depozıtter kólemi azaıdy
ALMATY. QazAqparat - 2017 jylǵy aqpannyń sońynda depozıtterdiń kólemi qańtar-aqpanda 6,2%-ǵa tómendep, 17 045,4 mlrd. teńgeni qurady, dep habarlaıdy QazAqparat tilshisi Ulttyq banktiń baspasóz qyzmetine silteme jasaı otyryp.
«Mundaı serpin ulttyq valıýtadaǵy depozıtter ulǵaıǵan kezde (0,3%-ǵa) shetel valıýtasyndaǵy depozıtter kóleminiń azaıýyna (11,5%-ǵa) baılanysty boldy. Nátıjesinde, depozıtterdiń dollarlaný deńgeıi 2016 jylǵy jeltoqsandaǵy 54,6%-dan 2017 jylǵy aqpanda 51,5%-ǵa deıin tómendedi. Zańdy tulǵalardyń valıýta salymdarynyń úlesi jyl basynan 49,1%-dan 45,8%-ǵa deıin, jeke tulǵalardiki 62,0%-dan 58,8%-ǵa deıin tómendedi», delingen habarlamada.
Ulttyq banktiń málimetterine qaraǵanda, tól valıýtadaǵy depozıtterdiń ósýine jeke tulǵalar depozıtteriniń kóbeıýi áser etken.
«Olar jyl basynan 4,1%-ǵa nemese 121,3 mlrd. teńgege ulǵaıdy. Shetel valıýtasyndaǵy depozıtter teńgeniń nyǵaıýy nátıjesinde qaıta baǵalaý esebinen de (qańtar-aqpanda 6,2%-ǵa), naqty áketilýi esebinen de (5,7%-ǵa) tómendedi», delingen habarlamada.
