Ulttyq Bank rezervterdi saqtaý úshin óziniń ishki valıýta naryǵyna qatysýyn qysqartady
ASTANA. QazAqparat - Ulttyq Bank rezervterdi saqtaý úshin óziniń ishki valıýta naryǵyna qatysýyn qysqartady. Bul týraly QR UB baspasóz qyzmetinen habarlady.
«Ulttyq Bank 2015 jylǵy qyrkúıekte jáne qazanda 2015 jylǵy 20 tamyzda jarııalaǵan, teńgeniń erkin ózgermeli baǵamyna ótý tásilinen alshaqtap, valıýta naryǵynda valıýtany satýǵa kiristi.
Ulttyq Banktiń valıýta naryǵyna qatysý úlesi 60%-ǵa jetti. Osy kezeńde Ulttyq qor qarajatynyń jáne Ulttyq Banktiń altynvalıýta aktıvteriniń esebinen 5 mlrd. AQSh dollarynan astam soma kóleminde qarajat satyldy. Ulttyq Banktiń jáne Ulttyq qordyń altynvalıýta aktıvterin saqtaý maqsatynda Ulttyq Bank 2015 jylǵy 5 qarashadan bastap óziniń valıýta naryǵyna qatysýyn barynsha azaıtý týraly sheshim qabyldady. Bul Ulttyq Banktiń erkin baǵamdy qalyptastyrý jáne ınflıatsııalyq targetteýge ótý jónindegi buryn jarııa etilgen saıasatyna sáıkes keledi. 2015 jylǵy 5 qarashada teńgeniń AQSh dollaryna qatysty aıyrbastaý baǵamynyń nomınaldy ózgerýi ótken kúndegi mánniń 5%-yn qurady. Bul ózgeris qarjylyq turaqtylyq úshin qaýip tóndirmeıdi jáne Ulttyq Banktiń baǵa turaqtylyǵyna qol jetkizý maqsatyna qaıshy kelmeıdi. Ulttyq Bank óziniń suranys pen usynystyń araqatynasyn jáne irgeli faktorlardyń qoldanylýyn kórsetpeıtin baǵamnyń edáýir aýytqýyn retteý quqyǵyn saqtaıdy. Teńgeniń aıyrbastaý baǵamynyń budan bylaıǵy serpini negizinen álemdik qarjy jáne taýar naryqtaryndaǵy baǵa ahýalynyń serpinimen aıqyndalatyn faktorlardyń áserinen qalyptasatyn bolady.
Ulttyq Banktiń aqsha-kredıt saıasaty boıynsha buryn jarııalanǵan, 2015 jylǵy 6 qarashaǵa josparlanǵan otyrysy aýystyrylyp, ótkizilý kúni qosymsha habarlanatyn bolady», - dep jazylǵan habarlamada.
