Ulttyq bank ótken aıda 940 mln. dollar satyp aldy
ASTANA. QazAqparat - Ulttyq bank ótken aıda 940 mln. dollar satyp aldy. Bul týraly KTK telearnasyna suhbat bergen QR Ulttyq bankiniń tóraǵasy Danııar Aqyshev málim etti.
«Halyq pen kásiporyndar teńge baǵamynyń ózgergenine emes, onyń óz teńgerim núktesin izdeı bastaýyna, ıaǵnı eki tarapqa kezek-kezek aýytqýyna narazy boldy. Ol alǵashqy kúnderi aıtarlyqtaı nyǵaısa, odan keıin qaıta quldyrady. Problema Ulttyq banktiń qaıta ınterventsııaǵa kirisýinen paıda boldy. Sol sátte qalyptasqan baǵam, menińshe, óz teńgerim núktesin taba alǵan joq. ıAǵnı, munaı baǵasy qaıta quldyraı bastap, reseılik rýbl qunsyzdana bastady. Al Reseı - bizder úshin eń birinshi kezekte ımport boıynsha negizgi saýda seriktesimiz. Bizdiń olarǵa táýeldiligimiz bar, biryńǵaı ekonomıkalyq odaqtamyz. Soǵan sáıkes biz olardyń aqsha-nesıe saıasattarynyń ózgerýine qaraı áreket etýge májbúr boldyq. Sondyqtan 5 qarashada Ulttyq bank taǵy da valıýta naryǵyna qatysýyn azaıtatyndyǵy týraly málimdeme jasady. Ol kezde baǵam bir dollarǵa 282 teńge bolatyn. Biz bul jaıynda jarııa etkennen keıin jáne 5 qarashadan soń baǵam bir dollarǵa 312-313 teńgege deıin álsiredi», - dedi Ulttyq bank tóraǵasy.
Onyń atap ótýinshe, qarasha aıynda Ulttyq bank valıýta satyp aldy. Óıtkeni, bastapqy tómendeýden keıin teńge baǵamy qaıta nyǵaıa bastaǵan edi. Bank bul qadamǵa bıýdjet zardap shekpeýi úshin baryp otyr. Sebebi, ol eksporttaýshylardyń esebinen tolyǵady, al eksport úshin teńge baǵamynyń tómen bolýy tıimdi. Buǵan qosa, qazaqstandyq taýarlar barynsha qymbattap ketpeýi úshin, ıaǵnı otandyq taýar óndirýshilerdiń básekege qabilettiligin qamtamasyz etý úshin osyndaı qadamǵa barýǵa týra keldi. 1-30 qarasha aralyǵynda Ulttyq bank 940 mln. dollar satyp aldy.
Tolyqtaı alǵanda, D.Aqyshevtyń sózine qaraǵanda, qazirgi ýaqyttaǵy Ulttyq banktiń saıasaty teńge baǵamynyń kúrt ózgerýine jol bermeý bolyp tur. Aıta keterligi, teńge baǵamyn turaqty túrde bir deńgeıde ustap turý da Ulttyq banktiń maqsaty emes.
