Ulttyq bank ókili valıýtanyń qazirgi ahýalyn túsindirdi
Onyń paıymynsha, damyǵan jáne damýshy elderdiń valıýtalary ınflıatsııa men geosaıası turaqsyzdyqqa qarsy kúres aıasynda qysymǵa ushyrap otyr. Ulttyq valıýta da ornyǵyp qalǵan ishki faktorlarǵa baılanysty jáne syrtqy ózgeristerdiń áserinen qubylmaly kúı keshýde.
«Dollardyń resmı baǵamy aı basynan beri 12,16 teńgege nemese 2,6%-ǵa álsirep, 8 shildede 477,24 teńgeni qurady. Bul oraıda, AQSh dollarynyń jahandyq nyǵaıýy, energııa tasymaldaýshylar baǵasynyń tómendeýi, sondaı-aq Qazaqstandaǵy Kaspıı qubyry jelisi konsortsıýmynyń teńiz termınaly qyzmetin toqtata turý táýekelderi, sol sebepten naryqqa qatysýshylar sentımentiniń nasharlaýy, qazaqstandyq kompanııalardyń ımporttyq operatsııalary teńge dınamıkasyna áser etken negizgi faktorlar boldy. AQSh qazynashylyq oblıgatsııalary kiristiliginiń ósýi men AQSh dollarynyń nyǵaıýy damyǵan, sol sııaqty damýshy elderdiń valıýtalaryna qysym jasady», - dedi ol.
Nurjan Tursynhanovtyń málimetinshe, DXY ındeksi 7 shildede 107,13 deńgeıine deıin, ıaǵnı 2,3%-ǵa ósti, al JPMorgan damýshy elderi valıýtalarynyń ındeksi 3,3%-ǵa álsiredi. Eýronyń AQSh dollaryna qatysty 1,016 deńgeıine deıin álsireýi shamamen tepe-teńdikke jetip, eleýli jaǵdaı oryn aldy.
«7 shildedegi jaǵdaı boıynsha, Brent markaly munaı baǵasy aı basynan beri 8,8%-ǵa tómendep, barreline 104,65 AQSh dollaryn qurady. Máskeý bırjasyndaǵy Reseı rýbliniń baǵamy aı basynan beri 20%-ǵa álsirep, 61,95 deńgeıinde qalyptasty. Іshki faktorlar arasynda ımporttyq operatsııalardy júzege asyrý úshin valıýtaǵa saqtalyp otyrǵan suranys, syrtqy boryshtardy óteý, sondaı-aq jeke tulǵalar tarapynan shetel valıýtasyna turaqty suranys teńge dınamıkasynyń negizin qalady», - dedi Ulttyq bank ókili.
Jalpy alǵanda, energııa tasymaldaýshylar baǵasynyń tómendeýine baılanysty naryqqa qatysýshylar sentımentiniń nasharlaýy baıqalady.
Erkin ózgermeli baǵam jaǵdaıynda teńge úshin qubylmalylyqtyń oryn alýy – naryqtaǵy qalypty jaǵdaı.
Mamannyń aıtýynsha, aı basynan beri Ulttyq bank valıýtalyq ınterventsııalar júrgizgen joq. Bul rette qarjylyq turaqtylyqqa tónetin qaýipti boldyrmaý úshin vedomtsvo shamadan tys baǵam qubylmalyǵy kezinde valıýta saýda-sattyǵyna aralasý quqyǵyn ózine qaldyrady.
«Qysqa merzimdi perspektıvada teńge dınamıkasy ımporttyq operatsııalar men demalys maýsymy aıasynda qatysýshylar tarapynan shetel valıýtasyna suranystyń artýyna baılanysty bolady. Kórshiles óńirlerdegi geosaıası ahýal, sondaı-aq álemdik naryqtardaǵy jaǵdaılar damýshy elderdiń valıýtalaryna qatysty ınvestorlardyń jalpy sentımentine yqpalyn saqtaıdy», dedi Nurjan Tursynhanov.
Ulttyq bank teńgerimsizdikterdiń jınaqtalýyn boldyrmaıtyn jáne altyn-valıýta rezervteriniń saqtalýyn qamtamasyz etetin ıkemdi baǵam belgileý rejımin ustanýdy jalǵastyra beredi.
