Ulttyq bank ókili teńgeniń nelikten nyǵaıǵanyn túsindirdi
Ulttyq bank tóraǵasynyń orynbasary Álııa Moldabekova keltirgen málimetterge qaraǵanda, bir aıda aıyrbastaý baǵamy munaı baǵasynyń joǵarylaý, eksporttyq valıýtalyq túsimniń ulǵaıýy, damýshy naryqtardyń, onyń ishinde Reseı rýbliniń nyǵaıýy, iri salyq kezeńi jáne jeke tulǵalardyń shetel valıýtasyna suranysynyń jalpy tómendeýi aıasynda 6,8%-ǵa nyǵaıdy.
Valıýta naryǵyndaǵy usynys ta kvazımemlekettik sektor sýbektileriniń valıýtalyq túsimin satýy esebinen qoldaý tapty, olardyń satý kólemi mamyrda 598 mln AQSh dollaryna jýyq boldy.
Bıýdjetke iri salyq tólemderi kezeńi jáne valıýtany satýdyń tıisti qajettiligi aıasynda shetel valıýtasynyń usynysy suranystan edáýir asyp tústi. Ótimdilikti qoldaý jáne salyq aptasy kezeńinde shetel valıýtasyna suranys pen usynys arasyndaǵy qalyptasqan teńgerimsizdikti túzetý maqsatynda Ulttyq bank 110,5 mln AQSh dollaryna shetel valıýtasynyń artyq usynysyn satyp aldy.
«Interventsııa kólemi jalpy naryqtyń shamamen 4,6%-yn quraǵanyn, bul rette Ulttyq banktiń qatysýy beıtarap bolǵanyn jáne baǵam belgileýge áser etpegenin atap ótken durys»,-dedi Álııa Moldabekova.
Onyń aıtýynsha, Ulttyq qordan respýblıkalyq bıýdjetke transfertter bólý úshin aı basynda 4 mln AQSh dollary satyldy. Budan keıin transfertterdiń Ulttyq qorǵa túsetin túsimder esebinen qamtamasyz etilýine baılanysty Ulttyq qordyń valıýtalyq qarajatyn konvertatsııalaý qajet bolǵan joq.
Zeınetaqy aktıvteriniń valıýtalyq úlesin keminde 30% deńgeıinde ustaý maqsatynda, ınvestıtsııalyq portfeldi ártaraptandyrý úshin mamyrda BJZQ valıýta naryǵynda zeınetaqy aktıvteri úshin 74,5 mln AQSh dollaryn satyp aldy.
