Ulttyq bank ókili ІI toqsandaǵy ekonomıkanyń naqty sektoryndaǵy jaǵdaıǵa baǵa berdi

NUR-SULTAN. QazAqparat – Kásiporyndar arasynda Ulttyq bank júrgizgen saýalnama nátıjesi boıynsha, 2021 jyldyń ІI toqsanynda taý-ken ónerkásibinen jáne kólik pen qoımada saqtaý salasynan bólek barlyq salada daıyn ónimge degen suranystyń birshama nasharlaǵanyn ańǵarýǵa bolady.

Bul týraly 2021 jyldyń ІI toqsanynda ekonomıkanyń naqty sektoryndaǵy kásiporyndarda júrgizilgen saýalnama nátıjesi týraly (salalyq konıýnktýralyq sholý) baıandaǵan QR Ulttyq bankiniń Aqsha-kredıt saıasaty departamentiniń dırektory Jandos Shaımardanovtyń túsindirmesine aıtylǵan.

Suranystyń ósý qarqynynyń baıaýlaýy óńdeý ónerkásibinde, saýdada, qurylysta baıqaldy. Aýyl sharýashylyǵy boıynsha suranys kórsetkishi teris aımaqqa aýysty. 2021 jyldyń 3-toqsanynda suranys ósse, ol tek aýyl sharýashylyǵynda ósedi degen boljam bar, al basqa salalarda ósý baıaýlap, tipti tómendep ketýi de múmkin.

2021 jyldyń 2-toqsanynda shıkizat, materıaldar men daıyn ónim baǵasynyń ósý qarqyny jedeldeı túskeni barlyq salada baıqaldy. 2021 jyldyń 3-toqsanynda baǵanyń ósý qarqyny baıaýlaıdy dep kútilýde.

«Sóz bolyp otyrǵan salalarda óndiris kólemi ulǵaıyp, dıffýzııalyq ındeks ósý salasyna ótti. Óńdeý ónerkásibinde eń joǵary ósim bar. 2021 jyldyń 3-toqsanynda bul salada da ósý qarqyny báseńdeıdi dep kútilýde»,-deıdi Ulttyq bank ókili.

Onyń derekterinshe, atalǵan salalarda básekelestiktiń mańyzdylyǵy joǵary deńgeıde, ıaǵnı, burynǵysynsha saqtalyp otyr. Saýda kásiporyndary naryqtyq básekelestiktiń yqpalynan shyǵa alar emes, munda kásiporyndardyń 40,1%-y óz bıznesine qatysty básekelestiktiń áserin sezdi. Óńdeý ónerkásibinde mundaı kásiporyndardyń úlesi 31,6%-ǵa, kólik salasynda 25,6%-ǵa, qurylys salasynda 24,9%-ǵa jetedi. Aýyl sharýashylyǵy men taý-ken ónerkásibinde eń az úles (tıisinshe 18,2% jáne 16,1%) baıqaldy.

Kásiporyndardyń edáýir bóligi (34,1%) úshin olardyń iskerlik belsendiligin tejeıtin basty kedergi Qazaqstan ekonomıkasynyń jaı-kúıine qanaǵattanbaý bolyp tabylady. Bul rette óńdeý ónerkásibi men saýda salasy ónimge degen suranysqa baılanysty eleýli problemalardy (tıisinshe 30,9% jáne 27,6%) bastan keship otyr, aýyl sharýashylyǵy men óńdeýshi kásiporyndar bilikti kadrlardyń tapshy ekenin (tıisinshe 26,8% jáne 25,2%) alǵa tartty.

Kelesi 12 aıda barlyq sala boıynsha qarjylandyrý kólemi burynǵy qalpynda saqtalady. Bul rette óńdeý jáne taý-ken óndirý ónerkásibi barynsha molyraq qarjylandyrylyp, kerisinshe, qurylys pen saýdada az qarjy bólinedi degen jospar bar.

«Saýalnamaǵa barlyǵy 2,6 myńnan astam óndirýshi men óńdeýshi ónerkásip, qurylys, saýda, aýyl sharýashylyǵy, kólik jáne qoıma ustaýshy kásiporyndar qatysty»,-delingen habarlamada.