Ulttyq bank ókili eldegi bıznes-ahýalǵa qatysty jaǵdaıǵa baǵa berdi

NUR-SULTAN. QazAqparat - Alynǵan baǵalaýdyń nátıjesi boıynsha, iskerlik belsendilik ındeksi aqpan aıynda joǵarylap, 50,6 (qańtarda – 50,0) boldy. Indekstiń joǵarylaýy – qyzmet kórsetý sektoryndaǵy kórsetkishtiń 50,6-ǵa deıin kóterilýimen baılanysty (qańtarda – 49,4). Ónerkásip pen qurylysta ındeksterdiń máni aıtarlyqtaı ózgermeı, sáıkesinshe 51,4 jáne 46,0 qurady (qańtarda – 51,8 jáne 45,7).

Bul týraly 2022 jyldyń aqpan aıyndaǵy iskerlik belsendilik ındeksi týraly QR Ulttyq bankiniń Aqsha-kredıt saıasaty departamenti dırektorynyń orynbasary Denıs Chernıavskııdiń túsindirmesinen málim boldy, dep habarlaıdy QazAqparat.

Onyń derekterine qaraǵanda, aımaqtar boıynsha aqpanda 8 óńirde iskerlik belsendilik jaqsaryp, 9 óńirde nasharlaǵany baıqaldy. Іskerlik belsendiliktiń neǵurlym joǵary deńgeıi Túrkistan oblysy (56,2) men Shymkent qalasynda (53,7), tómen deńgeıi Jambyl oblysy (44,7) men Almaty qalasynda (45,7) tirkeldi.

2022 jyldyń aqpan aıynda kásiporyndar búgingi bıznes-jaǵdaıdy jalpylaı teris baǵalady, alaıda baǵalaý ótken aıǵa qaraǵanda jaqsyraq boldy: oń jáne keri baǵalardyń aıyrmasy boıynsha jaýaptar teńgerimi qańtardaǵy (-) 2,3 ten (-) 1,4 deıin kóterildi.

Kásiporyndardyń deregi boıynsha, qarjy/nesıeniń qoljetimdiliginen basqa faktorlardyń baǵasy jaqsardy. Atalǵan faktor 2021 jylǵy qańtardan beri alǵash ret teris mánge ıe boldy (-0,5). Qalǵan faktorlardyń (salyq aýyrtpalyǵy, suranys deńgeıi, bıznesti qorǵaý máseleleri) baǵalaýy jaqsarǵanymen, áli de teris mánge ıe bolyp otyr (sáıkesinshe, (-)5,5, (-)4,0 jáne (-)1,1). Oń mánge ıe bolǵany – tek ınfraqurylym (0,7).

Aldaǵy 6 aıǵa arnalǵan bıznes-jaǵdaıǵa qatysty optımızm joǵarylady: bolashaq jaǵdaıdy baǵalaý 21,5 qurady (qańtarda – 17,9), sonymen qatar qazirgi bıznes jaǵdaıdyń baǵasy jaqsaryp, (-)1,4 boldy (qańtarda (-)2,3). Nátıjesinde ekonomıkada bıznes ahýal ındeksi 11,4-ke deıin aıtralyqtaı joǵarylady (qańtarda – 7,4).

2022 jylǵy aqpanda saýalnamaǵa 465 kásiporyn qatysty: qurylysta – 71, ónerkásipte – 177, qyzmet kórsetýde – 217.