Ulttyq bank naýryzdan bastap $232 mln kóleminde valıýtalyq ınterventsııa júrgizgen
ALMATY. QazAqparat - QR Ulttyq banki tóraǵasynyń orynbasary Álııa Moldabekova qyrkúıektegi valıýta naryǵynyń ahýaly týraly aıtty, dep habarlaıdy QazAqparat tilshisi.
«Qyrkúıekte naryqtar óte qubylmaly boldy. Koronavırýstyń ekinshi ret qaıtalanýy Eýropanyń birqatar elderinde jáne Ulybrıtanııada baıqalyp otyr, bul birinshi kezekte, bylaısha aıtqanda «sentımentke» nemese álemdik naryqtardaǵy ahýalǵa áser etedi. Birqatar álemdik ortalyq bankterdiń negizgi mólsherlemeler boıynsha sheshimderi, geosaıası táýekelderdiń ósýi, sondaı-aq AQSh-ta aldaǵy ýaqytta bolatyn prezıdent saılaýy erekshe nazarda boldy», - dedi Álııa Moldabekova.
Aýstralııanyń, Kanadanyń, Eýroaımaqtyń, Anglııanyń, AQSh-tyń, Reseı men Qytaıdyń ortalyq bankteri negizgi mólsherlemelerdi burynǵy deńgeıde saqtady.
FRJ ınflıatsııa 2%-dan asqanǵa deıin mólsherlemeni 0,00–0,25% deńgeıinde ustap turýǵa nıetti.
«Koronavırýs jaǵdaıyna baılanysty alańdaýshylyq ınvestorlardy AQSh-tyń qazynashylyq oblıgatsııalary sııaqty qaýipsiz aktıvterge kóshýge ıtermeledi. Amerıka valıýtasynyń damyǵan naryqtardyń negizgi valıýtalaryna qatysty serpinin kórsetetin dollar ındeksi eki aılyq sharyqtaý shegine jetip, qyrkúıektiń sońyna qaraı 1,9%-ǵa nyǵaıdy. Damyǵan naryqtarmen qatar damýshy elderdiń valıýtalary bir aıda tómendedi: túrik lırasynyń quldyraýy 5,2%, Reseı rýbliniń tómendeýi 4,9%-ǵa jetti. Bul ishinara naqty sebepterge baılanysty boldy, al Meksıka, Brazılııa jáne Indonezııa valıýtalary 2,2% – 2,7%-ǵa tómendedi», - dedi ol.
Onyń aıtýynsha, koronovırýstyń ekinshi ret qaıtalanýyna baılanysty qaýiptený, AQSh-taǵy prezıdenttik saılaýǵa deıin táýekelge barýdyń tómendeýi jáne qarjy naryqtaryn qoldaý úshin qosymsha ótimdilikti engizýge qatysty FRJ tarapynan naqty sıgnaldyń bolmaýy aıasynda S&P500 jáne MSCI World qor ındeksteri qyrkúıekte sáıkesinshe 3,9-ǵa jáne 3,6%-ǵa azaıdy.
Qyrkúıekte Brent surypty munaıdyń baǵasy 10%-ǵa tómendep, maýsymdaǵy deńgeıine qaıta oraldy. Suranystyń yqtımal shekteýleri men usynystyń artýy týraly jańalyqtar munaı baǵasyna qosymsha qysym kórsetti. Lıvııa taý-ken kásiporyndary Lıvııa ulttyq armııasynyń munaı ken oryndary men porttardy segiz aılyq qorshaýdan keıin munaı óndirýdi qaıta bastaǵanyn málimdedi. Al Úndistanda munaıǵa suranys kemigen.
Sondaı-aq Álııa Moldabekova Ulttyq banktiń naryqtardaǵy qubylmalylyq jáne munaı naryǵyndaǵy baǵalardyń tómendeýi jaǵdaıyndaǵy is-qımyldary týraly da aıtty.
«Teris syrtqy faktorlardyń jıyntyǵy valıýta naryǵyndaǵy suranystyń artýyna ákeldi. Qyrkúıekte bırjadaǵy saýda-sattyq kólemi $2,6 mlrd-qa jetti. Bul naryqtardyń quldyraýy bolǵan naýryzdy qospaǵanda, jyl basynan bergi eń joǵary kórsetkish bolyp otyr.
«Munaı naryǵy sııaqty damýshy elder valıýtalarynyń serpini jaǵynan da syrtqy faktorlar kúrt nasharlaǵan sońǵy úsh aıda artyq qubylmalylyqty retteý maqsatynda Ulttyq bank aǵymdaǵy jylǵy naýryzdan bastap alǵashqy ret $232 mln kóleminde valıýtalyq ınterventsııa júrgizdi. Satý bırja naryǵynda altynvalıýta aktıvterinen júzege asyryldy jáne jalpy úrdis qalyptasýyna áser etpedi. Tutastaı, bir aı boıy shetel valıýtasyna suranys artýyna qaramastan, kepildi transfertti qamtamasyz etý sheńberinde Ulttyq qordan shamamen $551 mln teńge mólsherinde satýlar, sondaı-aq qyrkúıekte $300 mln bolǵan kvazımemlekettik sektor sýbektileriniń satýlary teńgege qoldaý kórsetti», - dedi spıker.