Ulttyq bank munaı baǵasyna boljam jasady
«Bizdiń ekonomıkamyzdyń qurylymyn eskere otyryp, munaı baǵasy ekonomıkalyq belsendilik pen ınflıatsııalyq protsesterdiń aǵymdaǵy jáne bolashaq dınamıkasyn anyqtaıtyn negizgi faktorlardyń biri retinde qarastyrylady. Karantındik shekteýlerdiń alynyp tastalýy aıasynda óndiris kólemin shekteý jáne energııa resýrstaryna suranystyń artýy boıynsha OPEK + kelisimin oryndaý munaı baǵasynyń ósýin negizinen qalpyna keltirdi «, - dedi Aqyljan Baımaǵambetov.
Halyqaralyq agenttikterdiń boljamy boıynsha, Brent markaly munaıdyń ortasha baǵasy 2020 jyldyń aıaǵyna deıin barreline 40 dollarǵa, 2021 jyly 45 dollarǵa kóteriledi.
«Degenmen, álemdik shıkizat naryǵyndaǵy suranys pen turaqsyzdyq dınamıkasy áli de saqtalyp otyr. Mysaly, Iraktyń qıyn qarjylyq jaǵdaıyna baılanysty OPEK + kelisimi boıynsha mindettemeler oryndalmaýda. Qytaıdan munaıǵa degen suranys azdap tómendedi. Sondyqtan «2020 jyldyń tamyz-qyrkúıek» boljamdy raýndy sheńberinde biz konservatıvti tásildi ustanamyz jáne Brent markaly munaıdyń baǵasy 2020-2021 jyldar aralyǵynda orta eseppen bir barreline 40 dollardan baǵalanady «, - dep atap ótti spıker.
Ekonomıkaǵa munaı baǵasymen qatar, Qazaqstannyń syrtqy seriktes elderindegi ekonomıkalyq belsendilik pen ınflıatsııa, álemdik taýar naryqtaryndaǵy ahýal, azyq-túliktiń álemdik baǵalarynyń dınamıkasy da áser etedi.
Sonymen qatar, ishki faktorlar retinde ekonomıka salalaryndaǵy ahýal, halyqtyń kiristeri, eńbek naryǵy jáne aqsha-nesıe kórsetkishteri qarastyrylady.
