Ulttyq bank makroekonomıkalyq saýalnama nátıjesin jarııalady
Saýalnamaǵa Qazaqstan aýmaǵynda makroekonomıkalyq kórsetkishterdi taldaýmen jáne boljaýmen aınalysatyn 10 uıym qatysty. Respondentterdiń qataryna naryqtyń kásibı qatysýshylary, zertteý ınstıtýttary, halyqaralyq uıymdar men reıtıngilik agenttikter endi.
«Makroekonomıkalyq saýalnamada Ulttyq banktiń boljamdary joq ekenin atap ótken jón. Onda ishki jáne álemdik naryqtardaǵy ahýaldyń damý barysy týraly naryqtaǵy kásibı qatysýshylardyń derbes pikirlerine, baǵalaýlaryna jáne kútýlerine sholý qamtylǵan.
2023 jyldyń mamyr aıynda ótkizilgen saýalnamadan keıin respondentterdiń boljamy birshama ózgeriske ushyrady. Munaı baǵasy boıynsha stsenarıı sharttary 2023 jylǵa – tómendeý jaǵyna, al 2025 jylǵa – kóterilý jaǵyna qaıta qarastyrylǵan. Bul rette, respondentterdiń 2024-2025 jyldarǵa arnalǵan baǵalaý aýqymynyń aıasy tarylǵany baıqalady.
Stsenarıı shartyndaǵy munaı baǵasynyń tómendeýin eskergende, taýarlar men qyzmetterdiń eksporty boıynsha 2023 jylǵa arnalǵan boljamdar birshama nasharlaı tústi. 2024 jáne 2025 jyldarǵa arnalǵan baǵalaýlar ózgergen joq», - delingen habarlamada.
Málim etilgendeı, 2023-2024 jyldarǵa arnalǵan Qazaqstan ekonomıkasynyń ósimi boıynsha kútýler 4% deńgeıinde saqtaldy. Bul da JІÓ-niń uzaqmerzimdi áleýetti ósimin (4%) baǵalaýǵa sáıkes keledi. Qazaqstan ekonomıkasynyń 2025 jylǵa ósimi boıynsha boljamdar 4,0%-dan 4,1%-ǵa deıin birshama kóterildi.
Inflıatsııa boıynsha baǵalaýlar barlyq boljamdy kezeńde kóbine ósý jaǵyna qaraı qaıta qaralyp otyr. Respondentter 2023 jylǵy ınflıatsııany 12,2% (mamyrda – 11,8%), al 2024 jylǵy ınflıatsııany 9,4% (8,4%) deńgeıinde boljaıdy. Al, 2025 jyly ol 7,1%-ǵa (7,2%) deıin azdap tómendeıtini kútiledi.
Ótken kezeńmen salystyrǵanda, respondentter bazalyq mólsherleme 2023 jáne 2025 jyldary joǵary bolady dep kútedi. Osylaısha, 2023 jylǵa arnalǵan boljam jylyna orta eseppen 16,2%-dan 16,3%-ǵa deıin, 2025 jylǵa – 9,5%-dan 10%-ǵa deıin ósti. Respondentter 2024 jylǵy bazalyq mólsherlemeni 12% (mamyrda – 13%) deńgeıinde boljaıdy.