Ulttyq bank krıptovalıýtalarmen baılanysty táýekelder týraly taǵy da eskertti
ASTANA. Qazaqparat - Qazaqstannyń Ulttyq banki krıptovalıýtalarmen baılanysty táýekelder týraly taǵy da eskertti, dep habarlaıdy «QazAqparat» HAA vedomostvonyń baspasóz qyzmetine silteme jasap.
«Sońǵy ýaqytta Qazaqstanda halyqty krıptovalıýtalarǵa ınvestıtsııa jasaýǵa shaqyratyn jarnama jasaý kompanııalary belsendi jumys isteı bastady, barynsha az shyǵynmen joǵary tabysqa ýáde beretin saıttar qurylýda, jeke tulǵalardyń qatysýymen Qazaqstan krıptovalıýtasyn jasaý týraly aqparat paıda bolýda, sondaı-aq krıptovalıýtalardy paıdalanýdyń artyqshylyǵy týraly aqparat taralýda.
Osyǵan baılanysty Qazaqstan Ulttyq Banki azamattar men zańdy tulǵalarǵa krıptovalıýtalar satyp alý jáne olarmen operatsııalar júrgizý kezindegi joǵary táýekelder týraly qaıta eskertý jasap jáne tómendegilerge kóńil bólýdi suraıdy»,- delingen vedomostvonyń habarlamasynda.
Ulttyq banktiń atap ótýinshe, tulǵalardyń krıptovalıýtalardy, onyń ishinde tokenderdi/monetalardy (ICO nemese Initial Coin Offering) bastapqy ornalastyrý arqyly taratý jónindegi qyzmetin memleket rettemeıdi jáne baqylamaıdy, bul krıptovalıýtalarmen mámilelerge qatysatyn azamattardyń quqyqtyq turǵydan qorǵalmaýyna ákep soǵady.
Sondaı-aq, salynǵan ınvestıtsııalardyń saqtalýyna kepildik joq, sebebi krıptovalıýtalar/tokender naqty aktıvtermen qamtamasyz etilmegen, olardyń naqty quny joq jáne qandaı da bir tulǵalardyń aqshany qaıtarý jónindegi mindettemeleri joq.
Josyqsyz sýbektilerdiń jyldam paıda alý maqsatynda krıptovalıýtalardy taratý/tokenderdi ornalastyrý jáne krıptovalıýtalar baǵasymen aıla-sharǵy jasaý arqyly aqsha tartýy úshin qarjy pıramıdalarynyń belgileri bar alaıaqtyq shemalardy paıdalaný múmkindigi.
Krıptovalıýtalardyń jasyryn sıpatta bolýy jáne olardy paıdalanýdyń transshekaralyǵy olardy qylmystyq jolmen alynǵan kiristerdi jylystatýdyń jáne terrorızmdi qarjylandyrýdyń qylmystyq shemalarynda paıdalaný úshin múmkindik jasaıdy.
Krıptovalıýtalar qarjy quraly (aktıv), valıýtalyq qundylyq jáne tólem quraly, onyń ishinde elektrondyq aqsha retinde qarastyrylmaıdy jáne paıdalanylmaıdy.
Ulttyq Bank osyndaı shemalarǵa qatysatyn nemese krıptovalıýtalarmen operatsııalar júrgizýdi josparlaıtyn tulǵalarǵa óz áreketteri úshin táýekeldi jáne jaýapkershilikti ózderi kóteretinin taǵy da eske salady.
