Ulttyq bank «Kompetenz» kompanııasyn lıtsenzııasynan aıyrdy
«Ulttyq Bank basqarmasynyń 2019 jylǵy 31 qańtardaǵy № 10 qaýlysymen kompanııa 2019 jylǵy 1 aqpannan bastap lıtsenzııanyń qoldanylýyn birneshe ret (sońǵy on eki aı ishinde eki ret) toqtatqany úshin «Saqtandyrý qyzmeti týraly» zańda kózdelgen negizder boıynsha «jalpy saqtandyrý» salasyndaǵy saqtandyrý (qaıta saqtandyrý) qyzmetin júzege asyrýǵa berilgen lıtsenzııasynan aıyryldy», - delingen taratylǵan aqparatta.
Jalpy, Ulttyq bank kompanııaǵa qatysty 2014 jyldan bastap júıeli túrde birneshe ret mynadaı sharalar qoldanǵan: 2014 jyly shekteýli yqpal etý sharalary - 6 ret, ákimshilik jaza túrindegi sanktsııalar - 41 ret; 2015 jyly shekteýli yqpal etý sharalary - 10 ret, ákimshilik jaza túrindegi sanktsııalar - 1 ret; 2016 jyly shekteýli yqpal etý sharalary - 7 ret, ákimshilik jaza túrindegi sanktsııalar - 11 ret; 2017 jyly shekteýli yqpal etý sharalary - 9 ret, ákimshilik jaza túrindegi sanktsııalar - 69 ret, basshy qyzmetkerlerdi shettetý - 1 ret; 2018 jyly shekteýli yqpal etý sharalary - 9 ret, ákimshilik jaza túrindegi sanktsııalar - 33 ret, lıtsenzııanyń qoldanylýyn toqtata turý - 2 ret, jeke saqtandyrý synyby boıynsha lıtsenzııadan aıyrý - 1 ret.
Alaıda atalmysh sharalardan eshqandaı nátıje bolmaǵan. Sondyqtan Ulttyq bank saqtandyrýdyń jekelegen sanattary boıynsha lıtsenzııany eki ret toqtata turdy jáne júkterdi saqtandyrý sanaty boıynsha lıtsenzııadan aıyrdy. Munan bólek, tekserý aıasynda kompanııanyń laýazymdy adamdary jasasqan kompanııa aktıvteriniń 1/3 mólsherindegi qarajatty, onyń ishinde shetelde qaıta saqtandyrý kezinde shyǵarý belgileri bar mámileler anyqtaldy. Tıisti materıaldardy Ulttyq bank quqyq qorǵaý organdaryna bergen.