Ulttyq bank kollektorlar úshin boryshkerlermen jumys ýaqytyn belgileıtin bolady
ASTANA. QazAqparat - QR Ulttyq banki zań arqyly kollektorlyq agenttikter úshin boryshkerlermen jumys ýaqytyn naqty belgileýdi usynady.
Bul týraly búgin Májiliste «Kollektorlyq qyzmet týraly» zań jobasynyń tanystyrylymy barysynda málim boldy.
Zań jobasy boıynsha kollektorlyq qyzmetke qatysty birqatar shekteýler men tyıymdar engizilmek. Atap aıtqanda, bankterge, bank operatsııalarynyń jekelegen túrlerin júzege asyratyn uıymdar úshin kollektorlyq agenttikke boryshkerdiń turǵyn úı túrinde kepilmen qamtamasyz etilgen bereshekterin berýge tyıym salynady. Sonymen qatar, ekinshi deńgeıli bankter men mıkroqarjy uıymdaryna kollektorlyq agenttikter quraýyna jáne olarǵa kapıtaldyq qatysýǵa da tyıym belgilenip otyr.
«Boryshkerlermen jumys ýaqyty da zań júzinde belgilenetin bolady. Máselen, kollektorlar jumys kúnderi saǵat 21:00-den 8:00-ge deıingi aralyqta jáne demalys, mereke kúnderi saǵat 19:00-den 10:00-ge deıingi kezeńde ózara is-qımyldy júzege asyrýǵa tyıym salynady. Sondaı-aq, eger kredıttik shartta kózdelmese, boryshkerdiń kelisiminsiz kredıttik shart quqyǵyn berýge de tyıym salynady», - deıdi QR Ulttyq banki tóraǵasynyń orynbasary Alpysbaı Ahmetov.
Onyń aıtýynsha, zań jobasyn qabyldaý nátıjesinde birqatar áleýmettik-ekonomıkalyq jaǵymdy saldar oryn alatyny kútiledi. Atap aıtqanda, boryshkerlerge psıhologııalyq qysymnyń agressıvtik ádisterin qoldanatyn «kóleńkeli» kollektorlyq agenttikterdiń qyzmeti shektelip, osynyń arqasynda áleýmettik shıelenis tómendeıdi.
