Ulttyq bank «Kazınvestbankke» bergen aqsha týraly túsinikteme berdi
ASTANA. QazAqparat - Ulttyq bank «Kazınvestbankke» nege aqsha bergenin jáne ol aqshany nege keri qaıtaryp almaǵanyn túsindirip berdi, dep habarlaıdy QazAqparat.
Ulttyq banktiń monetarlyq operatsııalar departamenti dırektorynyń orynbasary Nurjan Tursynhanovtyń aıtýynsha, 200 mıllıard teńge shaǵyn jáne orta kásipkerlikti qoldaý úshin bankterge kelisilgen túrde berilgen eken.
«Biz qarajat bólý jolyn ózgerttik dep aıttyq. 30 banktiń bárin jınap, osy júıege qatysýǵa shaqyrdyq. Biz qarajatty bank reıtıngisine baılanysty, 14 paıyzdan 16,5 paıyz aralyǵynda beremiz degen talap qoıdyq. Nesıe 3,5 jylǵa berildi jáne osy 3,5 jyldyń alty aıy - qarjyny ıgerýge, qalǵan úsh jyly nesıeniń ózine arnalady dedik. «Damý» kásipkerlikti damytý qoryn shaqyryp, monıtorıng júrgizdik. Osy 200 mlrd teńgeniń ishinen biz 15 bankke 113 mlrd teńge qarajat bóldik. Qalǵan 15 bank óz sebepterin aıtyp, qarjylandyrýdan bas tartty. Bul baǵdarlama aıasyndaǵy qarjy ekenin aıtqymyz kelip otyr»,-dep túsindirdi ol.
Qarajat alǵandardyń arasynda keıinirek lıtsenzııasynan aıyrylǵan «Kazınvestbank» bar edi. Nurjan Tursynhanov lıtsenzııasynan aıyrylǵan bankten qarajat nege keri qaıtarylyp alynbaǵanyn túsindirdi.
«2016 jyldyń 1 qazanyndaǵy jaǵdaıǵa sáıkes, «Damý» qory habarlaǵandaı, «Kazınvestbank» bólingen qarjynyń 99,9 paıyzyn, ıaǵnı, 2,9 mlrd teńgeni tolyq ıgerip qoıypty. «Kazınvestbank» 2016 jyldyń sáýirinde alǵan qarajatyn áýel basta keliskendeı alty aı ishinde shaǵyn jáne orta kásipkerlikke berip qoıǵan. Bul qarajat ekonomıkanyń naqty bir salasyna baǵyttalyp qoıǵan soń, biz ol aqshany keri qaıtara almadyq»,-deıdi ol.
Buǵan deıin buqaralyq aqparat quraldary habarlaǵandaı, depozıtterdi kepildendirý qory «Kazınvestbankte» depozıtte saqtaǵan úsh mıllıardqa tartqa aqshany biryńǵaı jınaqtaýshy zeınetaqy qoryna qaıtarmaıtyn boldy dep habarlaǵan bolatyn.
