Ulttyq bank Qajymuqannyń 150 jyldyǵyna oraı kollektsııalyq monetalaryn aınalymǵa shyǵarady

ALMATY. QazAqparat - Nomınaly 100 teńgelik melhıordan soǵylǵan moneta «Este qalatyn oqıǵalar men birtýar adamdar» serııasyn jalǵastyrady. 2021 jyly qazaq balýany jáne tsırk ártisi Qajymuqan Muńaıtpasulynyń týǵanyna 150 jyl tolady, dep habarlaıdy QazAqparat QR Ulttyq bankiniń resmı saıtyna silteme jasap.

Moneta betiniń (aversiniń) ortalyq bóliginde Qazaqstan Respýblıkasynyń Memlekettik eltańbasy beınelengen. Eltańbanyń oń jaǵy men sol jaǵynda ulttyq oıý-órnektiń elementteri ornalasqan. Monetany aınaldyra QAZAQSTAN ULTTYQ BANKI • NATIONAL BANK OF KAZAKHSTAN degen jazý jazylǵan. Tómengi bóliginde monetanyń nomınalyn bildiretin 100 TEŃGE jazýy bar.

Monetanyń ekinshi betinde (reversinde) Qajymuqan Muńaıtpasulynyń sýreti, portrettiń sol jaǵynda mereıtoılyq datany bildiretin 150 JYL degen jazý, oń jaǵynda kúres óneriniń fragmenti men monetanyń shyqqan jylyn bildiretin «2021» degen jazý, sol jaǵyna qaraı monetany aınaldyra QAJYMUQAN MUŃAITPASULY degen jazý ornalasqan.

Kollektsııalyq moneta MN25 melhıor quımasynan, salmaǵy – 15 gramm, dıametri – 33 mm, sapasy – brilliant uncirculated, nomınaly – 100 teńge, taralymy – 15 000 dana bolyp daıyndaldy.

Moneta kollektsııalyq quny boıynsha satýǵa arnalǵan. Olar Qazaqstan Respýblıkasynyń aýmaǵynda barlyq tólem túrinde nomınaldy quny boıynsha qabyldaýǵa jatady, sondaı-aq monetalardy bank shottaryna salyp, aýdarym jasaýǵa, Qazaqstan Respýblıkasynyń barlyq bankterinde aıyrbastap, usaqtaýǵa bolady.

Kollektsııalyq moneta Qazaqstannyń teńge saraıynda jasalǵan.