Ulttyq bank Qazaqstannyń syrtqy qaryzyna qatysty aqparatty jarııalady
ALMATY. QazAqparat - Ulttyq bank qazirgi ýaqyttaǵy syrtqy qaryzdyń kólemin jarııalady, dep habarlaıdy QazAqparat tilshisi.
QR Ulttyq banki tóraǵasynyń orynbasary Alpysbaı Ahmetovtiń aıtýynsha, 2017 jyldyń 1 shildesindegi jaǵdaı boıynsha Qazaqstan Respýblıkasynyń syrtqy qaryzy 167,9 mlrd AQSh dollaryn qurap otyr.
Onyń ishinde 7,9 paıyzy nemese 13,2 mlrd dollar memlekettik sektordyń, 3,7 paıyz nemese 6,2 mlrd dollar bank sektorynyń, 25,2 paıyz nemese 42,4 mlrd dollar basqa da sektorlardyń, qalǵan 63,2 paıyzy nemese 106,1 mlrd dollar fırmaaralyq sektorlardyń qaryzy.
«Memlekettik sektordyń syrtqy qaryzy halyqaralyq qarjy naryǵyna shyǵarylǵan erkin evrooblıgatsııalardyń qunynyń ósýine baılanysty jáne Ulttyq banktiń qysqa merzimdi notalaryna rezıdent emes taraptardan suranystyń artýyna baılanysty 0,4 mlrd dollarǵa kóbeıdi. Bankterdiń (ekinshi deńgeıli bankter men «Qazaqstannyń damý banki» AQ) syrtqy mindettemeleri 1,0 mlrd AQSh dollaryna azaıdy. Onyń ishinde, qazirgi syrtqy qaryz ben evrooblıgatsııalardy josparly túrde óteý bar», - dedi ol.
Alpysbaı Ahmetov fırmaaralyq qaryzdardyń 1,8 mlrd AQSh dollaryna deıin kóbeıýiniń sebebin túsindirdi.
«Munaı-gaz jobalaryn qarjylandyrýdyń jalǵasýyna ári ınvestorlardyń aldyndaǵy dıvıdenttermen qaryz syıaqylaryn ótemeý sebepterine baılanysty fırmaaralyq qaryzdar 1,8 mlrd AQSh dollaryna deıin kóbeıdi», - dedi ol.
