Ulttyq bank Qazaqstannyń qalalary týraly eskertkish monetalardy aınalysqa shyǵardy
ALMATY. QazAqparat - QR Ulttyq bank nomınaldyq quny 50 teńgelik, neızılber qospasynan «Qazaqstannyń qalalary» monetalar serııasynan «Astana», «Almaty», «Kókshetaý», «Shymkent» eskertkish monetalaryn aınalysqa shyǵarady. Bul týraly banktiń baspasóz qyzmeti habarlady.
«Eskertkish monetalardyń bet jaqtaryndaǵy (aversindegi) beıneleri birdeı. Monetalardyń bet jaǵynda (aversinde) ortalyq bóliginde monetanyń nomınalyn bildiretin «50 TEŃGE» degen jazý bar. Joǵarǵy bóliginde - oıý-órnekti segiz buryshty rozetka, tómengi bóliginde - ulttyq oıý-órnek elementi. Nomınaldyń oń jaǵynda «QUB» degen abbrevıatýra ornalasqan. Aınaldyra shyǵyńqy jıek. Monetalardyń syrt jaǵynda (reversinde) ortalyq bóliginde ár qalanyń gerbi beınelengen. Aınaldyra memlekettik tilde «QAZAQSTAN RESPÝBLIKASY» degen jazý, monetanyń soǵylǵan jylyn bildiretin «2015» degen san jáne shyǵyńqy jıek júrgizilgen. Jazý men san núktelermen bólingen. Monetalar «neızılber» qospasynan jasalǵan, dıametri 23 mm, massasy 4,71 gramm, árqaısysynyń taralymy 50 myń dana», - delingen habarlamada. Eskertkish monetalardy «Qazaqstan Respýblıkasy Ulttyq bankiniń Qazaqstan teńge saraıy» sharýashylyq júrgizý quqyǵyndaǵy respýblıkalyq memlekettik kásiporny daıyndaǵan. Monetalardyń dızaıny Qazaqstan Respýblıkasy Prezıdentiniń 2003 jylǵy 25 qyrkúıektegi №1193 Jarlyǵymen bekitilgen Qazaqstan teńgesi Ulttyq valıýta banknottary men monetalary dızaınynyń tujyrymdamasyna sáıkes ázirlengen. Eskertkish monetalar Qazaqstan Respýblıkasynyń búkil aýmaǵynda kórsetilgen qunymen tólemniń barlyq túrleri boıynsha, sondaı-aq shottarǵa, salymdarǵa, akkredıtıvterge esepteý úshin jáne aýdarym jasaý úshin qabyldanýǵa mindetti, Qazaqstan Respýblıkasynyń barlyq bankterinde shekteýsiz usaqtalady jáne aıyrbastalady. Árbir ataýdaǵy monetalardyń bir myń danasy jaqsartylǵan sapamen daıyndaldy jáne arnaıy plastıkalyq termovakýýmdy oraýmen satýǵa arnap shyǵaryldy. «Astana» monetasy eki myń dana sanmen «Qazaqstannyń qalalary» serııasynyń monetalaryna arnalǵan albom túrindegi oraýǵa oralǵan. Monetalardy Qazaqstan Respýblıkasy Ulttyq bankiniń barlyq fılıaldarynda, sondaı-aq QRUB-nyń www.nationalbank.kz saıtynyń «Ulttyq valıýta» paraqshasyndaǵy Internet dúken arqyly satyp alýǵa bolady. Almaty qalasynda myna mekenjaı boıynsha satyp alýǵa bolady: Panfılov kóshesi, 98. Anyqtama úshin telefony +7 (727) 273-83-98.
