Ulttyq bank qazaqstandyqtarǵa qarajat jınaǵyn tıimdi saqtaýdyń jolyn usyndy
Altyn men kúmiske salynǵan qarjy ınvestıtsııany ınflıatsııa men valıýtalyq táýekelden saqtap qana qoımaıdy, sonymen qatar básekege qabiletti kiristi de qamtamasyz ete alady. Altyn men kúmis qunynyń teńgedegi dınamıkasynan kórinip turǵandaı, Ulttyq banktiń ólshemeli altyn quımalary men ınvestıtsııalyq monetalaryna ınvestıtsııa salý – uzaq merzimdi perspektıvada joǵary tabysty kórsetedi. 2000 jyldan 2022 jylǵa deıingi aralyqta altyn baǵasynyń ortasha jyldyq ósý qarqyny 18% bolsa, kúmis baǵasy úshin bul kórsetkish – 15,1% .
QUB-tyń ınvestıtsııalyq quraldaryndaǵy artyqshylyqtardyń biri – onyń naryqtaǵy ótimdiligi, ol ólshemeli quımalar men ınvestıtsııalyq monetalardy keri satyp alýǵa ótkizý múmkindigimen qamtamasyz etiledi. Eger altyn quımalar zaqymdanbaǵan tutas qaptamamen keri satyp alýǵa ótkizilse, altyn quımanyń ıesi olar úshin ótkizgen kúni tólem alady. QUB-tyń ólshemeli quımalary men ınvestıtsııalyq monetalary satý boıynsha alynatyn qosylǵan qun salyǵynan bosatylǵan, bul da satyp alýshylarǵa úlken artyqshylyq beredi.
Sonymen qatar, jaqyn arada Ulttyq banktiń ınternet-dúkeni arqyly ınvestıtsııalyq monetalarǵa aldyn ala tapsyrys berýge múmkindik týady. Ondaı jaǵdaıda satyp alýshylar ózderine yńǵaıly ýaqytta monetalardy alyp kete alatyn QUB fılıalyn tańdaı alady. Tańdalǵan fılıalda monetalar bolmasa, olar fılıalǵa QUB esebinen jetkiziledi. Monetalardy daıyndaý men logıstıkany eskergende jetkizýdiń ortasha ýaqyty 4-6 aptany quraıdy.
Monetalar fılıalǵa kelip túskennen keıin satyp alýshylar QUB fılıalyna barý kúni men ýaqytyn belgileý týraly habarlama alady. Aldyn ala tapsyrys berý kezinde monetalar úshin tólem júrgizilmeıdi. Monetalardyń quny QUB fılıalynda satyp alynǵan kúndegi baǵaly metaldyń teńgedegi qunyna baılanysty anyqtalady.
Teńgedegi quny London baǵaly metaldar naryǵynyń qaýymdastyǵymen (LBMA) anyqtalǵan sáıkes metaldyń bir troıa ýntsııasynyń baǵasy jáne teńgeniń dollarǵa qatysty resmı baǵamy boıynsha anyqtalǵan.
