Ulttyq bank qazaqstandyqtardyń kredıtin jaýyp berý protsedýrasyn túsindirdi
«QR Prezıdenti 2019 jylǵy 26 maýsymda «Qazaqstan Respýblıkasy azamattarynyń borysh júktemesin azaıtý sharalary týraly» 2019 jylǵy 26 maýsymdaǵy № 24 Jarlyqqa qol qoıdy, onda úsh negizgi baǵyt qamtylǵan. Osy Jarlyqty iske asyrýdyń birinshi baǵyty ekinshi deńgeıdegi bankterde jáne mıkroqarjylyq uıymdarda azamattardyń jekelegen sanattary úshin kepilsiz tutynýshylyq qaryzdar boıynsha bereshekti 300 myń teńgege deıingi mólsherde óteýdi kózdeıdi. Bereshek somasy 2019 jylǵy 1 maýsymdaǵy jaǵdaı boıynsha 3 mln teńgeden aspaýǵa tıis. Ulttyq Bank Úkimetpen jáne naryqqa qatysýshylarmen birlesip belgilengen ólshemsharttarǵa sáıkes keletin adamdar tizbesin qalyptastyrý jáne olardyń beresheginiń jalpy mólsherin anyqtaý boıynsha jumysty bastap ketti», - delingen taratylǵan málimette.
Úkimet «Problemalyq kredıtter qory» AQ-ǵa (Operator) respýblıkalyq bıýdjetten nysanaly qarjylandyrý bóletin bolady.
Budan ári, Operator azamattardyń jekelegen sanattarynyń kepilsiz tutynýshylyq qaryzdar boıynsha 300 myń teńgege deıingi bereshegin óteý úshin ekinshi deńgeıdegi banktermen jáne mıkroqarjylyq uıymdarmen sharttar jasasady. Óz tarapynan Ulttyq Bank bereshekti óteý boıynsha málimetterdiń qaryz alýshylardyń kredıttik tarıhynyń derekqorynda kórsetilýine baqylaýdy qamtamasyz etedi.
«Ekinshi baǵyt Qazaqstannyń búkil azamattaryna kepilsiz tutynýshylyq qaryzdar boıynsha eseptelgen aıyppuldar men ósimpul somalaryn esepten shyǵarýdy kózdeıdi. Aǵymdaǵy aı aıaqtalǵan soń, Ulttyq Bank banktermen jáne mıkroqarjylyq uıymdarmen birlesip, kepilsiz tutynýshylyq qaryzdar boıynsha eseptelgen aıyppuldar men ósimpulǵa 2019 jylǵy 1 shildedegi jaǵdaı boıynsha salystyryp tekserý men tirkeýdi júzege asyrady. Eseptelgen aıyppuldar men ósimpuldy esepten shyǵarý birinshi kezekte bankterdiń jáne mıkroqarjylyq uıymdardyń qarajaty esebinen júzege asyrylady. Eseptelgen aıyppuldar men ósimpuldardyń jalpy kóleminen 30%-dan aspaıtyn soma Ulttyq Bank aıqyndaǵan Operatordyń qarajaty esebinen óteledi. Bul maqsattar úshin Ulttyq Bank Operatorǵa qajetti qarjylandyrý kólemin bóledi», - dep atap ótilgen UB aqparatynda.
Eki jaǵdaıda da qaryz alýshyǵa bankke, MQU-ǵa nemese basqa uıymdarǵa ótinish berý talap etilmeıdi. Bankter jáne mıkroqarjylyq uıymdar bereshekti óteý jáne eseptelgen aıyppuldar men ósimpuldy esepten shyǵarý boıynsha búkil jumysty derbes jasaıdy. Árbir qaryz alýshyny bank/mıkroqarjylyq uıym jumys nátıjeleri týraly habardar etedi.
Eske sala ketsek, QR Premer-Mınıstriniń birinshi orynbasary - Qarjy mınıstri Álıhan Smaıylov azamattardyń nesıesin óteý týraly Prezıdent Jarlyǵyn túsindirdi.
