Ulttyq bank qaıta qarjylandyrý mólsherlemesin bazalyq mólsherlemege teńestirdi
ASTANA. QazAqparat - 24 aqpanda QR Ulttyq bank basqarmasynyń resmı qaıta qarjylandyrý mólsherlemesin jáne bazalyq mólsherlemeni konvergentsııalaý (ıaǵnı teńestirý) tetigi týraly qaýlysy qabyldandy. Bul týraly UB baspasóz qyzmeti habarlady.
«Mólsherlemelerdi konvergentsııalaý boıynsha sheshim 2016 jylǵy qarashada Qazaqstan Respýblıkasynyń aqsha-kredıt saıasatynyń 2017 jylǵa arnalǵan negizgi baǵyttary sheńberinde jarııalandy.
2017 jylǵy 1 sáýirden bastap resmı qaıta qarjylandyrý mólsherlemesiniń máni bazalyq mólsherlemeniń mánine teńestiriledi. Budan ári bazalyq mólsherlemeni ózgertý resmı qaıta qarjylandyrý mólsherlemesin avtomatty túrde jáne sınhrondy ózgertýge ákelip soǵady», - delingen aqpar hatta.
Mólsherlemelerdi konvergentsııalaý týraly sheshim ekonomıkanyń túrli segmentterinde aqshanyń qunyn teńestirý maqsatynda qabyldandy. Qazirgi ýaqytta aqsha naryǵyndaǵy aqsha quny bazalyq mólsherlememen (qazirgi sátte - 11%) aıqyndalady. Bul rette resmı qaıta qarjylandyrý mólsherlemesiniń zııandy óteý, jiberip alǵan paıdany esepteý úshin ósimpul, aıyppul eseptegen kezdegi azamattyq-quqyqtyq jáne ákimshilik-quqyqtyq qatynastarda paıdalanylatyn, 5,5% mólsherindegi aǵymdaǵy deńgeıi aqshanyń naqty qunyn kórsetpeıdi.
Bul rette, naryqtaǵy atalǵan teńgerimsizdikti joıý úshin neǵurlym ońtaıly tásil tańdalǵanyn atap ótý qajet - mólsherlemeler arasyndaǵy aıyrma eń az bolyp otyr.
