Ulttyq bank kásiporyndar arasyndaǵy saýalnama qorytyndysyn jarııalady

NUR-SULTAN. QazAqparat – QR Ulttyq banki Aqsha-kredıt saıasaty departamentiniń dırektory Jandos Shaımardanovtyń 2021 jylǵy IIІ toqsandaǵy ekonomıkanyń naqty sektory kásiporyndaryna júrgizilgen saýalnama nátıjesi boıynsha túsinik berdi, dep habarlaıdy QazAqparat tilshisi.

Naqty sektor kásiporyndaryna júrgizilgen saýalnamanyń qorytyndysy shıkizat pen materıaldar jáne daıyn ónim baǵasynyń ósý qarqynynyń baıaýlaǵanyn kórsetedi.

«2021 jylǵy 3-toqsanda barlyq qarastyrylyp otyrǵan salalarda (óndirýshi, óńdeýshi, qurylys, saýda, aýyl sharýashylyǵy, kólik) shıkizat pen materıaldar jáne daıyn ónim baǵasynyń ósý qarqynynyń baıaýlaýy baıqaldy. Aýyl sharýashylyǵynda, qurylys pen kólikte óndiristik qýattardy júkteý deńgeıi kóterildi. Barynsha joǵary deńgeı taý-ken óndirý salasynda (61,1%), tómen deńgeı – qurylysta (51,4%) saqtalyp otyr», - dedi J. Shaımardanov.

Respondentterdiń jaýaptaryna sáıkes, is júzinde barlyq salalarda básekelestik mańyzdylyǵynyń joǵary deńgeıi burynǵysynsha saqtalyp otyr. Kásiporyndardyń 42,4%-y óz bıznesine áserin sezinetin saýda kásiporyndary naryqtyq básekelestiktiń yqpalyna ushyraýǵa barynsha beıim bolyp keledi. Eń az úles aýyl sharýashylyǵy men taý-ken ónerkásibinde baıqaldy (tıisinshe 19,0% jáne 14,6%).

«2021 jylǵy 3-toqsanda saýalnamalarda pandemııanyń kásiporyndar qyzmetine áseri týraly bir rettik suraq engizildi. Osy oraıda, pandemııa saldarynan barlyq salalar, kóbinese – qurylys, aýyl sharýashylyǵy – azdap zardap shekti. Saýalnamaǵa barlyǵy 2,6 myńnan astam óndirýshi jáne óńdeý ónerkásibi, qurylys, saýda, aýyl sharýashylyǵy, kólik jáne qoımalaý kásiporyndary qatysty», - dep jazdy sarapshy.