Ulttyq bank qarjy naryǵynyń ornyqty jumys isteýi úshin sharalar qabyldaýda
ASTANA. QazAqparat - QR Ulttyq banki qarjy naryǵynyń ornyqty jumys isteýi úshin naqty sharalar qabyldaýda. Bul týraly búgin QR Úkimetiniń selektorlyq rejimdegi otyrysynda QR Ulttyq banki tóraǵasy Danııar Aqyshev aıtty, dep habarlaıdy QazAqparat.
«Qarjy júıesiniń negizgi sektory retinde bank sektorynyń qarjylyq turaqtylyǵyn qamtamasyz etý jáne ekonomıkanyń naqty sektoryn kredıtteýdi qalpyna keltirý maqsatynda Ulttyq bank Qazaqstan Respýblıkasy bank sektorynyń qarjylyq ornyqtylyǵyn arttyrý baǵdarlamasyn iske asyrýǵa kiristi», - dedi ol.
Onyń aıtýynsha, baǵdarlamanyń birinshi baǵyty Qazkommertsbankke qoldaý kórsetý Halyq banki strategııalyq ınvestorynyń kirýi arqyly iske asyryldy. Bul mámileniń nátıjesinde eki ınstıtýt ta ornyqty bola túsip, eń az talaptardy úlken qormen oryndaýda.
«Ulttyq bank basqarmasy baǵdarlamanyń ekinshi baǵyty - iri bankterdi qoldaý aıasynda kelip túsetin ótinimderdi qaraýdy bastady», - dedi D.Aqyshev.
Ulttyq bank basshysynyń aıtýyna qaraǵanda, taıaý ýaqytta bólinetin qarajatty ıgerý bastalady. Aǵymdaǵy qadaǵalaý protsesin jetildirý jáne táýekelge baǵdarlanǵan qadaǵalaýǵa ótý máseleleri pysyqtalýda.
«Saqtandyrý naryǵyn damytý boıynsha zań ázirlenip, Parlamentte qaraýda jatyr. Ol saqtandyrý qyzmetteriniń qoljetimdiligin arttyrý úshin jaǵdaılar jasaýǵa, saqtandyrý qyzmetteriniń sapasyn arttyrýǵa jáne qunyn tómendetýge, saqtandyrý qyzmetterin tutynýshylardyń quqyqtaryn qorǵaýdy kúsheıtýge, saqtandyrý naryǵynyń qarjylyq ornyqtylyǵyn qamtamasyz etýge baǵyttalǵan», - dedi ol.
Sonymen qatar, Ulttyq bank basshysy yryqtandyrylǵan valıýtalyq rejimniń qaǵıdattaryn saqtaýdy, valıýtalyq operatsııalardyń monıtorıngin jetildirýdi, onyń ishinde valıýtalyq retteý rejimderiniń rásimderin ońtaılandyrý arqyly jetildirýdi kózdeıtin, valıýtalyq retteý máseleleri boıynsha zań jobasy ázirlenip, kelisý sharasynan ótip jatqanyn aıtty.
