Ulttyq bank qarashada valıýtalyq ınterventsııa júrgizgen joq, teńge 0,14% álsiredi

ASTANA. QazAqparat - Qarashanyń qorytyndysy boıynsha teńge baǵamy 1 AQSh dollary úshin 468,90 teńgege deıin 0,14%-ǵa álsiredi. Qazaqstan qor bırjasyndaǵy saýda-sattyqtyń ortasha bir kúndik kólemi bir aıda 121-den 132 mln AQSh dollaryna deıin ulǵaıdy, dep habarlaıdy QazAqparat.

Ulttyq bank málimetinshe, saýda-sattyqtyń jalpy kólemi - 2,9 mlrd AQSh dollary.

Munaı baǵasy tómendegenine qaramastan, valıýta naryǵy suranys pen usynys turǵysynan, kóbine, «toqsandyq salyq aptasy» faktory esebinen teńgerildi.

Kvazımemlekettik sektor sýbektileriniń valıýtalyq túsimin satýy ótken aıdyń ishinde shamamen 500 mln AQSh dollaryn qurady.

Kvazımemlekettik sektor kompanııalary valıýta naryǵynda satýdy ekinshi deńgeıli bankter arqyly derbes júzege asyrady.

Ulttyq qordan respýblıkalyq bıýdjetke transfertterdi qamtamasyz etý úshin valıýtany satý qarashada 70 mln AQSh dollaryn qurady.

Ulttyq qordan satý úlesi saýda-sattyqtyń jalpy kóleminen 2,4% jáne bir kúnde keminde 10 mln AQSh dollary boldy.

Ulttyq qordyń qarajatymen operatsııa júrgizý kezinde Ulttyq bank naryqtyq beıtaraptyq qaǵıdatyn saqtaıdy, bul shetel valıýtasyn turaqty jáne birkelki satýdy bildiredi.

Bul tájirıbe Ulttyq qor operatsııalarynyń valıýta naryǵyna áserin barynsha azaıtýǵa múmkindik beredi.

Qarashada Ulttyq bank valıýtalyq ınterventsııa júrgizgen joq, sondaı-aq BJZQ men senimgerlik basqarýdaǵy basqa da qorlardyń zeınetaqy aktıvteri úshin shetel valıýtasyn satyp alý nemese satý boıynsha operatsııa júrgizbedi.

Ulttyq bank ashyqtyq qaǵıdatyna saı valıýta naryǵynda júrgiziletin barlyq operatsııalar týraly tolyq aqparatty jarııa etýdi jalǵastyra beredi.

Qysqa merzimdi keleshekte teńgeniń qubylmalylyǵy geosaıası jaǵdaıdyń ózgerýine, ishki qatysýshylardyń kútýlerine jáne álemdik naryqtaǵy jaǵdaıǵa baılanysty bolady.

Ulttyq bank teńgerimsizdikterdiń jınalýyna jol bermeıtin jáne altyn-valıýta rezervteriniń saqtalýyn qamtamasyz etetin ıkemdi baǵam belgileý rejımin ustanýdy jalǵastyrady.