Ulttyq bank iskerlik belsendiliktiń qubylý sebepterin atady

NUR-SULTAN. QazAqparat – QR Ulttyq banki Aqsha-kredıt saıasaty departamentiniń dırektory Jandos Shaımardanovtyń 2021 jyldyń qyrkúıek aıyndaǵy iskerlik belsendilik ındeksi týraly túsindirmesin jarııalady, dep habarlaıdy QazAqparat tilshisi.

Uttyq bank mamandarynyń baǵalaýy boıynsha, eldegi iskerlik belsendiliktiń ındeksi qyrkúıek aıynda sál tómendegen. Tamyz aıynda atalmysh ındeks 50,2 bolsa, qyrkúıekte 49,8 bolyp otyr.

«Buǵan qurylys sektorynda kórsetkishterdiń tamyzdaǵy 51,9-ten 49,3-ke, qyzmet kórsetý sektorynda 50,7-den 49,1-ge deıin tómendeýi áser etti. Qurylys sektoryndaǵy ındekstiń nasharlaýyna iskerlik belsendilik pen jumyspen qamtýdyń, al qyzmet kórsetý salasynda – jańa tapsyrystar men jumyspen qamtýdyń báseńdeý, sondaı-aq jetkizý merzimderiniń ulǵaıýy sebep boldy», - dep jazady Ulttyq banktiń departament dırektory.

Sarapshynyń aıtýyna qaraǵanda, ónerkásip salasynda jańa tapsyrystar men jumyspen qamtý deńgeıi kóterilip, sonyń sebeinen iskerlik belsendilik ındeksi tamyzdaǵy 49,1-den 50,9-ǵa deıin jaqsarǵan.

Aımaqtar arasynda qyrkúıekte 10 óńirde iskerlik belsendiliktiń jaqsarsa, 7 óńirde nasharlaǵan. Neǵurlym joǵary deńgeı Túrkistan (54,9) men Shyǵys Qazaqstan (53,8) oblystarynda, eń tómen deńgeıi – Qyzylorda oblysynda (40,2) baıqalyp otyr.

«Qyrkúıek aıynda respondentter elde bıznes júrgizý isiniń nasharlaǵanyn atap ótti. Qazirgi bıznes-jaǵdaılardy baǵalaý boıynsha jaýaptar teńgerimi «-1» shamasynda belgilendi. Al tamyzda «+1,7» bolǵan. Barlyq sektorlardaǵy kásiporyndar ónimge/qyzmetke suranys bar ekenin atady. Kommýnıkatsııalar men kredıtterge qoljetimdilikti oń baǵalandy. Al salyq júktemesi men bıznesti qorǵaý máseleleri tamyzdaǵy sııaqty teris baǵalandy», - deıdi Jandos Shaımardanov.