Ulttyq bank ıpotekalyq qoldaý týraly: Halyqtyń áleýmettik osal toptary qamtylady

NUR-SULTAN. QazAqparat – QR Ulttyq banktiń ókili 2020 jyldyń 1 qańtarynan kúshine enetin ıpotekalyq turǵyn úı zaemdaryn qaıta qarjylandyrý baǵdarlamasynyń ózgeristeri týraly aıtty, dep habarlaıdy QazAqparat tilshisi.

QR UB Qarjy qyzmetteri tutynýshylarynyń quqyǵyn qorǵaý departamentiniń dırektory Aleksandr Terentevtiń sózine qaraǵanda, memleket bul baǵytqa qosymsha qarjy qarastyrmaıdy. Al bosańsytý sharalaryn usyný týraly sheshimdi jan-jaqty taldaýdan keıin kredıtor-bank qabyldaıdy.

«Birinshi kezekte bul túzetýler halyqtyń áleýmettik turǵyda osal toptaryn qoldaýǵa baǵyttalǵan. Olarǵa múgedek balany tárbılep otyrǵan otbasylar, múmkindigi shekteýli jandar, tolyq emes otbasylar kiredi. Sonymen qatar, asyraýshysynan aıyrylý nemese múgedektikke shaldyǵý sekildi ómirlik qıyn jaǵdaılar da bolyp jatady. Sol topty qoldaý kerek», - dedi A.Terentev.

Munymen qosa, zaemdar boıynsha mindettemeni oryndaý esebinen jalǵyz múlki bank balansyna ótip ketken azamattardy da qoldaý sharalary eskerilgen.

«Qarjylandyrýǵa toqtalsaq, qosymsha qarjy bólý qarastyrylmaǵan. Ipotekalyq qaryz alýshylardy qoldaýdyń osy sharalary buǵan deıin ıpotekalyq zaemdardy qaıta qarjylandyrýǵa bólingen qarajat aıasynda iske asyrylady. Qarajat bankterde salymdarda ornalastyrylady. Jáne kelisimshartpen belgilengen merzim ótkennen keıin Ulttyq bankke qaıtarylady», - dedi UB ókili.

Aıta keteıik, valıýtalyq ıpotekalyq qaryzdardy qaıta qarjylandyrý merzimi 2020 jylǵy 31 jeltoqsanǵa deıin uzartyldy. Qaryz alýshylar valıýtalyq ıpotekalyq qaryzdardy qaıta qarjylandyrý úshin 2020 jylǵy 15 jeltoqsannan keshiktirmeı kredıtor bankke ótinish berýi qajet.