Ulttyq bank: Inflıatsııanyń baıaýlaý úrdisi odan ári jalǵasady

ASTANA. QazAqparat – Inflıatsııanyń baıaýlaý úrdisi odan ári jalǵasady. Bul týraly Úkimet otyrysynda Ulttyq bank tóraǵasy Ǵalymjan Pirmatov aıtty, dep habarlaıdy QazAqparat tilshisi.

«Qazaqstandaǵy ınflıatsııa úsh aı qatarynan baıaýlap, mamyr aıynda jyldyq mánde 15,9 paıyzǵa deıin tómendedi. Inflıatsııanyń aılyq deńgeıi 0,6 paıyzdy qurady. Jyldyq mándegi azyq-túlik ınflıatsııasy aqpan aıyndaǵy eń joǵary 26,2-den 16,5 paıyzǵa deıin baıaýlady. Azyq-túlikke jatpaıtyn taýarlar ınflıatsııasy – 17,2, aqyly qyzmetter ınflıatsııasy 13,5 paıyzǵa deıin báseńdedi. Azyq-túlikke jatpaıtyn taýarlar boıynsha benzın men dızel otynynyń shekti baǵalary kóterilgendikten janar-jaǵarmaı baǵasy óskenin atap ótken jón. Ulttyq bank ınflıatsııanyń baıaýlaý úrdisi odan ári jalǵasady dep kútedi», - dedi ol.

Onyń atap ótýinshe, syrtqy ekonomıkalyq konıýnktýranyń jaqsarýy ınflıatsııany tejeýge yqpal etedi. Ol azyq-túlik baǵasynyń odan ári tómendeýinen jáne saýda-seriktes elderdegi tómen ınflıatsııadan kórinedi. Bazalyq stsenarııde belgilengen mólsherge qaraǵanda bıýdjet shyǵystarynyń aıtarlyqtaı joǵarylaýy, janar-jaǵarmaı men turǵyn úı-kommýnaldyq sharýashylyǵy qyzmetteri baǵasynyń ósýdegi janama áseri, logıstıkalyq jáne óndiristik jetkizý joldaryn qaıta qurý isiniń baǵa belgileýge áser etýi jáne ınflıatsııalyq kútýlerdiń joǵary deńgeıde bekitilý yqtımaly ınflıatsııa boljamynyń táýekelderine jatady.

«Bıyl 26 mamyrda Ulttyq bank táýekelder balansyn eskere otyryp, bazalyq mólsherlemeni 16,75 paıyz deńgeıinde saqtaý týraly sheshim qabyldady. Bul eldegi ınflıatsııany odan ári baıaýlatýǵa yqpal etedi», - dedi Ǵalymjan Pirmatov.