Ulttyq bank ınflıatsııaǵa ǵana emes, ekonomıkanyń ósimine de jaýapty bolýǵa tıis - Elbasy
ASTANA. QazAqparat - Ulttyq bank ınflıatsııa ǵana emes, sonymen qatar Úkimetpen birge ekonomıkanyń ósýine de jaýapty bolýǵa tıis, dep atap ótti Elbasy Nursultan Nazarbaev QR halqyna Joldaýynda.
«Búginde Ulttyq bank aldynda ınflıatsııalyq targetteý rejimin damytý jónindegi mańyzdy mindet tur. Orta merzim ishinde ınflıatsııa deńgeıin kezeń-kezeńmen 3-4%-ǵa deıin tómendetýge qol jetkizýimiz kerek», - dedi Prezıdent.
Memleket basshysy aıtýynsha, elimizdiń qarjy sektoryn «qaıta jańǵyrtý» qajet. Bul rette Ulttyq bankke bank sektoryn qalypqa keltirý jóninde sharalar keshenin ázirleýdi tapsyrdy.
«Bankterdiń balansyn tıimsiz nesıelerden aryltý jumysyn jedeldetip, qajet bolǵan jaǵdaıda olardyń kapıtalyn aktsıonerler tarapynan arttyrýdy qamtamasyz etý kerek. Bankterdiń ahýalyna jedel baqylaý ornatý úshin Ulttyq bankke kóbirek quqyq bergen jón. Ulttyq bank bankterdiń qatelik jiberýin kútpeı, olarǵa yqpal etetin sharalar qabyldaý úshin formaldi kózqarastan yqtımal qaterlerge jol bermeıtin qadamdarǵa kóshýge tıis.
Sondaı-aq, aýdıtorlyq kompanııalardyń jaýapkershiligin arttyryp, aktsıonerlerdiń ashyqtyǵyn qamtamasyz etý, ujymdyq basqarýdy jaqsartý qajet. Osynyń bárin zańnamalyq deńgeıde bekitý kerek.
Ekonomıkadaǵy qarajat jetispeýshiligi jáne nesıeler boıynsha joǵary mólsherleme túıtkilderin sheshý maqsatymen Ulttyq bank pen Úkimetke teńge túrinde qoljetimdi orta jáne uzaq merzimge arnalǵan qor qalyptastyrýdy qamtamasyz etý jóninde keshendi sharalar qabyldaýdy tapsyramyn.
Ulttyq bank ınflıatsııa ǵana emes, sonymen qatar Úkimetpen birge ekonomıkanyń ósýi úshin de jaýapty bolýǵa tıis», - dedi N.Nazarbaev.
