Ulttyq bank ımporttyń artýyna qaı taýarlar áser etkenin málimdedi
«2020 jyly tólem balansynyń aǵymdaǵy shot tapshylyǵy 6,3 mlrd AQSh dollary boldy. Aǵymdaǵy shottyń teris saldosy 1 mlrd AQSh dollaryna qysqarýy, birinshi kezekte, sheteldik ınvestorlarǵa tólenetin kiristiń qysqarýyna, sondaı-aq kiristerdi bólý jónindegi daýdy retteý aıasynda Qarashyǵanaq konsortsıýmyna qatysýshylardan valıýtanyń ákelinýine baılanysty boldy», - dedi A. Baımaǵambetov Senatta 2020 jylǵy bıýdjettiń atqarylýyna qatysty Úkimettiń jáne Esep komıtetiniń esepterin qaraý barysynda.
Onyń aıtýynsha, osy jylǵy 1-toqsanda tólem balansynyń aǵymdaǵy shoty 1,2 mlrd AQSh dollary tapshylyǵymen qalyptasty. Import aǵynynyń ulǵaıýy kezinde taýarlar eksportynyń tómendeýi tapshylyqtyń negizgi sebebi bolyp otyr.
«Jalpy eksportta úlesi 48,5 paıyzdy quraǵan munaı eksportyn qysqartý esebinen taýarlar eksporty 2,9 mlrd AQSh dollaryna tómendedi. Bul tómendeý 2020 jylǵy 4-toqsanda munaıdyń salystyrmaly túrde tómen baǵasyna baılanysty boldy, bul resmı statıstıkada munaı eksportyn esepke alý erekshelikterine baılanysty 2021 jylǵy 1-toqsandaǵy eksportta kórinis tapty», - dedi UB ókili.
Ulttyq bank málimetinshe, azyq-túlikke jatpaıtyn tutyný jáne ınvestıtsııalyq taýarlardyń ákelinýin ulǵaıtý esebinen ımport 4,8 paıyzǵa ósti.
«Taýarlar ımporty iskerlik belsendilik pen keıinge qaldyrylǵan ishki suranystyń qalpyna kelýi aıasynda ósip keledi. Importtyń eń kóp ósýi avtomobılder, kıim-keshek jáne kompıýterler sııaqty taýarlardy ákelýde baıqaldy», - dedi Aqyljan Baımaǵambetov.