Ulttyq bank: Halyq arasynda teńgeniń álsireýin kútetinder úlesi eki esege azaıdy
ASTANA. QazAqparat - Halyq arasynda teńgeniń álsireýin kútetinder úlesi eki esege azaıdy. Búgin Parlament Senatynyń jalpy otyrysynda 2015 jylǵy bıýdjettiń atqarylýy týraly Úkimettiń esebin talqylaý barysynda baıandama jasaǵan QR Ulttyq banki tóraǵasynyń orynbasary Alpysbaı Ahmetov osylaı málim etti.
«Іshki valıýta naryǵyndaǵy jaǵdaı birshama turaqty. Aıyrbastaý baǵamynyń kún saıynǵy aýytqýlary ádettegi shamada oryn alýda. Bular naryqta qatysýshylardyń kútilýimen aıqyndalady. Bul munaı baǵasynyń jáne elimizdiń negizgi iri saýda áriptesteriniń valıýta baǵamdary serpinine negizdeledi. Jalpy teńge baǵamynyń nyǵaıýy aǵymdaǵy jyldyń bes aıynda 1,2 paıyzdy qurady», - dedi A. Ahmetov.
Onyń aıtýynsha, teńge baǵamynyń kúrt aýytqýshylyǵyna jol bermeý, altyn-valıýta rezervin tolyqtyrý maqsatynda Ulttyq bank shetel valıýtasyn satyp alýdy jalǵastyrýda. «Jyl basynan bergi mamyr aıyna deıin netto-satyp alý kólemi 3,2 mlrd AQSh dollaryn qurady. Bul rette operatsııalar aıyrbastaý baǵamynyń serpindi úrdisterine áser etpeıdi. Sebebi olardyń sıpaty men kólemi naryqtaǵy jalpy jaǵdaıǵa áser etpeıdi. Jalpy alǵanda bizdegi valıýta baǵamy irgeli faktorǵa, álemdik munaı naryǵyna, kórshi elderdegi jaǵdaılarǵa, álemdik valıýta naryǵyna táýeldi», dedi A. Ahmetov.
UB ókiliniń aıtýyna qaraǵanda, Qazaqstandaǵy halyq tarapynan qolma-qol aqshany aıyrbastaý pýnktteri arqyly belsendi satý úrdisi jalǵasýda. Máselen, aqpan-sáýirde halyq 363 mln AQSh dollaryn satqan. Bul teńgedegi quraldar boıynsha barynsha tartymdy. «Al mamyr aıynda júrgizilgen saýalnamaǵa sáıkes, halyq arasynda teńge baǵamynyń álsireýin kútkender úlesi eki esege azaıdy», dedi A. Ahmetov.
