Ulttyq bank: Fitch Ratings halyqaralyq agenttigi Qazaqstannyń egemen reıtıngisin rastady
Agenttik memlekette oryn alǵan qańtar oqıǵalary bútindeı alǵanda ekonomıka ósiminiń traektorııasyna asa yqpal ete qoımaǵanyn atap ótti. 2022 jyly JІÓ ósimi 3,9% deńgeıin quraıdy dep boljanǵan. Agenttiktiń pikirinshe, OPEK+ kelisimine sáıkes munaıdy óndirýdiń josparly artýy, tabıǵı resýrstarǵa qatysty álemdik suranystyń ósýi, iri energetıkalyq jobalarǵa jasalatyn ınvestıtsııalar, sondaı-aq aýylsharýashylyq óndirisi kólemderiniń qalpyna kelýi qazaqstandyq ekonomıkanyń ósimine qoldaý kórsetetin bolady.
Kredıt reıtınginiń saqtalýyna septigin tıgizetin basty faktor – memlekettiń aýqymdy syrtqy rezervteri bolyp qalýda. Fitch Ratings baǵalaýy boıynsha 2021 jyldyń sońynda halyqaralyq rezervter JІÓ-niń 46%-yn quraǵan. Bul kredıt reıtıngi Qazaqstanmen salystyrýǵa keletin memleketter toby boıynsha medıanalyq kórsetkishten áldeqaıda joǵary. Degenmen kredıt reıtıngi deńgeıles memlekettermen salystyrǵanda Qazaqstannyń shıkizattyq taýarlarǵa táýeldiligi, ınflıatsııa deńgeıiniń joǵarylyǵy men ekonomıkalyq saıasat baǵdarlamasynyń jetkilikti shyńdalmaǵandyǵy týraly qorytyndy berildi.
Fitch Ratings analıtıkteriniń boljamyna sáıkes 2022 jyldyń sońyna qaraı ınflıatsııa deńgeıi 7%-dy quraıdy jáne 2023 jyldyń qorytyndysy boıynsha nysanaly dáliz shegine qaıtady. Agenttik ınflıatsııany tómendetý basty mindet ekenin atap ótti jáne áleýmettik-ekonomıkalyq jaǵdaıdy jaqsartýǵa baǵyttalǵan edáýir keńeıtilgen josparmen qatar ınflıatsııany turaqtandyrý boıynsha qabyldanǵan jedel ekonomıkalyq sharalarǵa erekshe nazar aýdardy.
Sondaı-aq, Fitch Ratings bank sektoryndaǵy retteý jáne qadaǵalaý tájirıbesiniń jaqsarǵanyna basa nazar aýdaryp, onyń kórsetkishteriniń jaqsarǵanyn atap ótti. Bank sektorynyń kórsetkishteri de jaqsarýda: jumys istemeıtin kredıtter deńgeıi osyǵan deıingi eń tómen kórsetkishke – 3,3% jetti, kapıtal men ótimdiliktiń jetkiliktiligi qamtamasyz etilýde. Sonymen qatar, kredıt reıtıngi boıynsha deńgeıles memleketter tobymen salystyrǵanda depozıtter dollarızatsııasynyń joǵary deńgeıi men kredıtteýdiń, sonyń ishinde ıpotekalyq kredıtteýdiń qarqyndy ósimi saqtalýda.
Fitch Ratings pikirine sáıkes kredıt reıtınginiń dınamıkasy saıası jáne áleýmettik damý, memlekettik basqarýdy jetildirý men ekonomıkalyq saıasattyń baǵyttaryna baılanysty bolady.