Ulttyq bank elimizdegi jeke tólem uıymdaryn esepke alatyn bolady
ASTANA. QazAqparat - Ulttyq bank elimizdegi jeke tólem uıymdaryn esepke alatyn bolady. Búgin Májilistiń jalpy otyrysynda QR Ulttyq bankiniń tóraǵasy Danııar Aqyshev osylaı málim etti. Otyrysta «Tólemder men tólem júıesi týraly» zań jobasy birinshi oqylymda talqylanǵan bolatyn.
UB basshysynyń aıtýynsha, búgingi tańda Qazaqstannyń tólem naryǵynda kúrdeli qurylymdyq ózgerister oryn alýda. Naryqqa jańa banktik emes oıynshylar shyǵyp, jańa býyn tólem qyzmetteri paıda bolyp jatyr. Halyqaralyq standarttardyń enýi nátıjesinde tólem júıesiniń tásilderi de ózgeriske ushyraǵan. Al qoldanystaǵy zańnamalyq baza tólem naryǵyn jáne onyń barlyq sýbektiler qyzmetin júıelik retteýdi qamtamasyz etpeıdi. «Aqsha tólemi men aýdarymdary týraly qoldanystaǵy zań bank pen onyń klıenti arasyndaǵy qarym-qatynastardy ǵana qamtıdy, tólemder men aqsha aýdarymdaryn júzege asyrý rásimderin reglamentteıdi. Osyǵan baılanysty tólem naryǵynyń jumys isteýi salasynda quqyqtyq negizdi qurý jáne qarym qatynastardy keshendi retteý, sondaı-aq tólemder men aqsha aýdarymdar rásimderi boıynsha normalardy jetildirý maqsatynda jańa zań jobasyn ázirleý qajettiligi týyndady», - deıdi UB tóraǵasy.
Onyń aıtýynsha, zań jobasynda tólem júıeleriniń jumysy reglamentteledi. Bul rette halyqaralyq standarttarǵa sáıkes, tólem júıeleri jiktelip, tólem qyzmetiniń naryǵy retteledi. «Sosyn zań jobasy naryqtyń sýbektilik quramyn aıqyndaıdy. Tólem qyzmetterin jetkizýshilerdiń uǵymy men sanattaryn engizedi, olardyń qyzmetterin retteý rejımin, sondaı-aq olar kórsetetin tólem qyzmetteriniń túrlerin aıqyndaıdy. Buǵan baılanysty Ulttyq bank jeke tólem uıymdaryn eseptik tirkeýden ótkizetin bolady», - dedi D. Aqyshev.
