Ulttyq bank: Elimizdegi barlyq bankter shtattyq rejımde jumys istep jatyr

NUR-SULTAN. QazAqparat - Elimizdegi barlyq bankter shtattyq rejımde jumys istep jatyr. Bul týraly Qazaqstan Respýblıkasynyń Qarjy naryǵyn retteý jáne damytý agenttigi men Qazaqstan Ulttyq Banki birlesip málimdedi, dep habarlaıdy QazAqparat tilshisi.

«Ekinshi deńgeıli bankter) barlyq banktik qyzmetteri – jalaqy men zeınetaqyny, járdemaqylardy esepteý jáne alý, olardy bankomattar arqyly sheshý sekildi bank qyzmetteri úzdiksiz jumys istep tur. Qarjy uıymdaryna tıesili bankomattar men termınaldar qolma-qol aqshamen tolyq qamtamasyz etilgen. Qazirgi ýaqytta ınternet jelisindegi jalpy irkilisterge baılanysty bank qosymshalary men tólem termınaldarynyń jumysynda ýaqytsha kidiris bar. Áleýmettik jeliler men messendjerlerde tarap jatqan – nesıelerdi esepten shyǵarý týraly aqparattyń shyndyqqa sáıkes kelmeıtinin resmı túrde habarlaımyz», - delingen habarlamada.

Qazaqstan Respýblıkasynyń Qarjy naryǵyn retteý jáne damytý agenttigi men Qazaqstan Ulttyq Banki azamattar men BAQ ókilderin tek resmı aqparat kózderine súıenýge shaqyrady.

Keńseler men fılıaldardyń jumysyna qatysty tolyǵyraq aqparatty bankterdiń Call-ortalyqtarynan bilýge bolady

Keńes alý úshin, sondaı-aq Qazaqstan Respýblıkasy Qarjy naryǵyn retteý jáne damytý agenttiginiń [phone] Call-ortalyǵyna jáne Qazaqstan Ulttyq Bankiniń 1477 qysqa nómir boıynsha baılanys-ortalyǵyna habarlasýǵa bolady.