Ulttyq bank: Elimizde nesıe alýǵa suranys ósti
Banktiń habarlaýynsha, 2021 jyldyń I toqsanynda kredıttik resýrstarǵa suranys pen usynystyń negizgi úrdisteri jaıynda bankter arasynda júrgizilgen saýalnama nátıjeleri boıynsha kásiporyndardan alynǵan nesıelerge suranys ındeksiniń azdap óskeni baıqalady. Buǵan iri bankterdegi bıznestiń iri jáne shaǵyn segmentterinde nesıeleýge degen suranystyń edáýir ulǵaıǵany áser etti.
Ótken toqsandaǵydaı, «Bıznestiń jol kartasy-2025» memlekettik baǵdarlamasy aıasynda kásipkerlik sýbektileri tarapynan nesıe qarajatyna degen qajettilik ótinimder sanynyń ósýine yqpal etti. Bıznes ókilderine onlaın qaryz berý qyzmetterin usynatyn bankterdiń sany aıtarlyqtaı ósti. Toqsan ishinde shaǵyn bıznes boıynsha ótinimder sany 1,5 esege ósip, 120 myńdy qurady, al iri bıznes segmentinde – 28%-ǵa artyp, 244-ke jetti.
Esepti toqsanda iri bızneske nesıe berýge kelgende jekelegen bankterdiń yqylasy birshama ósti jáne maquldaý koeffıtsıenti 2020 jyldyń IV toqsanyndaǵy 70%-dan 2021 jyldyń І toqsanyndaǵy 55%-ǵa deıin tómendegenine qaramastan, 2020 jyldyń І toqsanynan joǵary deńgeıde qalyp otyr.
Kelesi toqsanda bankter iri jáne orta bıznes tarapynan suranys artady dep boljaıdy, al shaǵyn bıznes segmentinde jaǵdaı kerisinshe. Esesine, bankterdiń kelesi toqsanda bıznesti nesıelendirý sharttaryn ózgertetin jospary joq.
Bul rette ıpotekalyq jáne kepildendirilmegen nesıege degen suranys ta ósti, al avtonesıege, kerisinshe, azaıyp, kepildendirilgen tutynýshylyq nesıege degen suranys burynǵy qalpynda qaldy. Ipotekalyq nesıege degen suranys jyljymaıtyn múlik naryǵynyń belsendi damýymen jáne turǵyn úı satyp alý nemese jóndeý maqsatynda zeınetaqy jınaqtaryn alý múmkindigimen baılanysty artty. Alaıda, maýsymdyq faktor suranystyń odan da kóbirek ósýin tejep tastady. Toqsan ishinde ótinimder sany 22%-ǵa azaıyp, shamamen 75 myńdy qurady.
Tutynýshylyq nesıe túrleri boıynsha suranys qurylymynda jan-jaqty ózgerister baıqalady. Kepilsiz nesıelerge de suranys ósti, ortasha chek 5%-ǵa artyp, 515 myń teńgeni qurady. Avtonesıe alý boıynsha ótinimder sany 5%-ǵa, al ortasha chek 11,3%-ǵa azaıdy. Bul rette kepilmen qamtamasyz etilgen tutynýshylyq nesıeler boıynsha ótinimder sanynda eleýli ózgerister baıqalmaıdy.
Esepti kezeńde bankterdiń ıpotekalyq, kepildi jáne kepilsiz nesıeler berýge daıyndyǵy burynǵy qalpynda qaldy, biraq avtonesıe segmentinde birshama tómendedi. Bankter buryn berilgen qaryzdardan bosatylǵan qarajat esebinen avtonesıeler berýdi jalǵastyra bastady jáne kelesi transhty «Qazaqstannyń Damý Banki» AQ jeńildetilgen baǵdarlamasy aıasynda aldaǵy toqsanda alýǵa nıetti.
2021 jyldyń II toqsanynda bankter ıpotekalyq jáne kepilsiz nesıege suranys óse beredi dep kútedi. Sonymen qatar, bankter avtonesıe berý sharttaryn jeńildetýdi de josparlap otyr.
2021 jyldyń І toqsanynda nesıeleý boıynsha bankter arasynda anketalyq tásilmen júrgizilgen saýalnamaǵa ekinshi deńgeıdegi 23 bank qatysty, bul rette olardyń 10-ymen qosymsha suhbat júrgizildi.
Ulttyq Bank kredıttik resýrstarǵa suranys pen usynystaǵy ózgeristerdi baǵalaý maqsatynda mundaı saýalnamany toqsan saıyn júrgizedi.
