Ulttyq bank elektrondyq ámııandy paıdalanýdyń jańa erejelerin túsindirdi
Elektrondyq ámııandar – yńǵaıly tólem quraly. Olardyń kómegimen taýarlardyń aqshasyn tólep, kommýnaldyq qyzmetter, salyqtar jáne basqa da kúndelikti tranzaktsııalardy júrgizýge bolady.
«Bul servısterdiń tanymaldylyǵy kúnnen kúnge ósýde. Elektrondyq ámııandar boıynsha qyzmetti bankter jáne de Ulttyq bankte tirkeýden ótken tólem uıymdary kórsetedi. Osy qyzmet boıynsha olardyń aınalymy 580 mlrd teńgeni qurady. 2020 jyldyń 17 shildesinde elektrondyq ámııandar qoldaný salasyn jetildirý úshin biz ázirlegen jańa zańnamalyq túzetýler kúshine endi»,– deıdi Ulttyq banktiń tólem júıeleri departamentiniń dırektory Erlan Ashyqbekov.
Negizgi maqsat – aqshany jylystatý jáne basqa da zańsyz operatsııalar úshin elektrondyq ámııandardy paıdalaný múmkindigin boldyrmaý. Ol úshin anonımdi paıdalanýshylar arasynda aýdarymdarǵa tyıym salynyp, olar úshin aqsha shyǵarýǵa shekteý engizildi.
«Bul jalpy álemdik tájirıbe men úrdis. Kóptegen elder osyndaı erejeler engizýde, Qazaqstan da osy qatarda. Sonymen qatar, taýarlar men qyzmetterdi burynǵydaı sáıkestendirý rásimin ótpesten, sonyń ishinde termınaldar arqyly tóleý mýmkindigi saqtalyp kaldy. Jalǵyz nárse – tólemdi tek sáıkestendirilgen paıdalanýshylar ǵana ala alady jáne somasy 50 AEK-ten aspaýy kerek»,– dep túsindirdi bank ókili.
Sáıkestendirý tolyq jáne jeńildetilgen bolyp ekige bólinedi. Klıent tolyq sáıkestendirýdi ótken jaǵdaıda onyń elektrondyq ámııanmen júrgiziletin operatsııalaryna qandaı da bir shekteýler qoıylmaıdy. Jeńildetilgen sáıkestendirýdi qashyqtan qyzmet kórsetý servıstary arqyly ótýge bolady.
«Birinshiden, ámııan ıesi basqa qoldanýshylardan aqsha aýdarymdaryn qabyldaı alady. Ekinshiden, operatsııalar lımıti 2 ese 100 AEK-ke deıin kóteriledi. Úshinshiden, aqshalardy elektrondyq ámııan arqyly óz shotyna ne tólem kartochkasyna shyǵarýǵa bolady»,– deıdi departament dırektory.
Osy jańashyldyqtyń arqasynda, kásipkerler qolma-qol aqshasyz tólemderdi qabyldaý boıynsha tranzaktsııalyq shyǵyndaryn azaıtady.
«Buryn kásipkerler ámııandy qoldanǵanda aldymen tólemderdi qabyldap, sosyn aqshany banktik shotqa shyǵarý kerek bolatyn. Bul qosymsha ýaqyt alyp, qosymsha shyǵynǵa ushyratatyn. Osy shekteý alynyp tastaldy, endi kásipkerler elektrondyq ámıandy esep aıyrylysý úshin paıdalanyp, basqa kásipkelermen tikeleı jumys isteı alady»,– dep tolyqtyrdy spıker.