Ulttyq bank Elbasyna zeınetaqy qorlarynyń qarajatyn paıdalanýǵa qatysty óz usynystaryn joldaıtyn bolady

Búgin Senattyń jalpy otyrysynda  depýtattar suraqtaryna jaýap bergen Ulttyq bank tóraǵasy Grıgorıı Marchenko osylaı málim etti.

«Bul máselege qatysty ártúrli usynystar bar. Olardyń barlyǵy jınaqtalyp ta jatyr. Bizdiń jobamyz da barshylyq, ókinishke qaraı men ol týraly aıta almaımyn. Degenmen, bul joba 1 shildege deıin QR Prezıdentine tapsyrylýy tıis», - deıdi Grıgorıı Marchenko.

Onyń aıtýynsha, zeınetaqy qorlarynyń qarajatyn paıdalanýǵa qatysty sarapshylar tarapynan usynystar kóp boldy. Ásirese, Dúnıejúzilik banktiń barlyq zeınetaqy qorlaryn biriktirip, olarda saqtalǵan qarajatty túgeldeı shetelge ınvestıtsııalaý týraly usynysy da qoǵam arasynda úlken daý týǵyzdy.

«Biz dál osy usynysqa qarsy ekenimizdi birneshe márte jarııaladyq.  Óıtkeni, sózsiz zeınetaqy qorlarynyń qarajaty tek qana elimizdiń naqty ekonomıkasyna jumys isteýleri shart. Sondyqtan da, biz álgindeı usynysty shynymen qoldamaımyz. Al sońǵy nusqa qandaı bolatynyn, Memleket basshysy qaısysyna kelisimin beretini aldaǵy ýaqytta belgili bolady. Bizdiń óz usynysymyz, Úkimettiń de usynystary bar, sońǵy nusqa ázirlenip jatyr», - dedi UB tóraǵasy.