Ulttyq bank ekinshi deńgeıli bankterdiń «jumys istemeıtin nesıelerinen» zalal kútip otyrǵan joq
ASTANA. QazAqparat - Qazaqstannyń Ulttyq banki elimizdegi ekinshi deńgeıli bankterdiń «jumys istemeıtin nesıelerinen» zalal kútip otyrǵan joq. Búgin Parlament Senatynyń depýtattarymen kezdesý barysynda QR UB Tóraǵasynyń orynbasary Qýat Qojahmetov osylaı málim etti.
«Biz birtalaı talqylap júrgen problemalardyń úlkeni - bankterdegi jumys istemeıtin aktıvter. Ókinishke oraı, Qazaqstan osy problema boıynsha álemdegi «chempıondar» qatarynda tur, bul kórsetkish 33 paıyzdan asady. Degenmen, aıta keteıin, bizdegi jumys istemeıtin kredıtterdiń barlyǵy derlik qorlarmen jabylǵan. ıAǵnı, bankterde qurylǵan rezervtermen kómkerilip otyr jáne biz qosymsha zalaldar kútpeımiz», - dedi Q. Qojahmetov.
UB ókiliniń aıtýynsha, búgingi kúni Ulttyq bank pen Úkimet birlese otyryp, ekinshi deńgeıli bankterdi saýyqtandyrý jumystaryn atqaryp jatyr. Onyń ishinde UB enshiles uıymy retinde Problemaly kredıtter qory qurylǵan. «Bul qor bıýdjetten qarjylandyrylady, oǵan qarastyrylǵan transfertter mólsheri 250 mıllıard teńgeni nemese 1,4 mıllıard AQSh dollaryn quraıdy», - deıdi Q. Qojahmetov.
